मुंबई : महाविकास आघाडी अन् इंडिया आघाडीची परिवर्तन सभा आज बीकेसीत पार पडली. यावेळी उद्धव ठाकरे पंतप्रधान नरेंद्र मोदींसह भाजपवर जोरदार बरसले. मोदीजी तुमच्यात हिंमत असेल तर संपवण्याचा प्रयत्न करुन बघा, असं थेट आव्हानच यावेळी त्यांनी मोदींना दिलं. तसंच येत्या ४ जूननंतर मोदी पंतप्रधान राहणार नाहीत, असंही ठाकरे यावेळी म्हणाले. (Modi ji if you dare try to end me Uddhav Thackeray direct challenge to PM Modi)

उद्धव ठाकरे म्हणाले, "मला काही वेळा काही लोकांची कीव येते की हे लोक असं जमवतात की जणू देशातील सर्व प्रश्न संपले आहेत, महागाई कमी झालेली आहे. सगळ्यांना रोजगार मिळेलेला आहे. सर्वजण ढेकर देऊन सुस्त पडलेत अशा वातावरणात लोक राहतात. चीन तिकडं आतमध्ये घुसला आहे. तिकडं ना मोदी जायला तयार ना अमित शहा जायला तयार नाही. पण सगळी फौज भाडोत्री, गद्दारांना घेऊन आज उद्धव ठाकरेंना संपवायला इकडे आलेले आहेत. पण मोदीजी तुमच्यात हिंमत असेल तर उद्धव ठाकरेंना संपवण्याचा प्रयत्न करुन बघा, हा महाराष्ट्र तुम्हाला महाराष्ट्राच्या मातीत गाडल्याशिवाय राहणार नाही"

हा महाराष्ट्र शाहू-फुले-आंबेडकरांचा महाराष्ट्र आहे, तो शहा-मोदी-अदानीचा महाराष्ट्र कदापी होऊ देणार नाही. तुम्ही कितीही डोकी आपटा, तुमची डोकी फुटतील. पण माझा मर्द मराठा एकही फुटणार नाही. तुम्ही जे सगळे गद्दार घेत आहात घ्या, काहीवेळेला एक गोष्टी बरी असते जो निसर्गाचा नियम आहे. ऋतु येतात ऋुतू जातात त्यामुळं सडलेली पान ही झडून जातात, त्याशिवाय नवी पानं येत नाहीत. आज सगळी सडलेली पानं माझ्या शिवसेना या वृक्षानं टाकून दिलेली आहेत, ही पानं कचरा गोळा करणाऱ्या गाडीवाल्यानं तुमच्या गळ्यात घातलीत. भाजप हा कचरा जमाव पक्ष झाला आहे.