मुझफ्फरपूर/हाजीपूर/सारण (बिहार) : पंतप्रधान नरेंद्र मोदी यांनी आज ‘इंडिया’ आघाडीच्या नेत्यांवर निशाणा साधताना त्यांना ‘भेकड’ असे म्हटले आहे. विरोधक हे पाकिस्तानच्या अण्वस्त्रांना घाबरतात, असा टोलाही त्यांनी या वेळी लगावला.

पंतप्रधानांनी हाजीपूर, मुझफ्फरपूर आणि सारण या लोकसभा मतदारसंघांमध्ये एकापाठोपाठ एक सभा घेतल्या. नॅशनल कॉन्फरन्सचे नेते फारुख अब्दुल्ला यांच्या ताज्या वक्तव्याचा दाखला देत मोदींनी विरोधकांना धारेवर धरले.

पंतप्रधान मोदी म्हणाले, ‘‘पाकिस्तानने जर त्यांच्या हातात बांगड्या घातल्या नसतील तर आम्ही त्यांना त्या घालायला भाग पाडू. मला माहिती आहे की त्यांच्याकडे खायला अन्नधान्य देखील नाही. आता तर असेही माझ्या कानावर पडले आहे की त्यांना बांगड्यांचा देखील पुरेसा पुरवठा होताना दिसत नाही. आमच्या विरोधकांमध्ये अत्यंत घाबरट आणि भित्र्या लोकांचा समावेश आहे. ही मंडळी आमच्या सर्जिकल स्ट्राईकवर संशय घेतात तसेच त्यांचे मित्र पक्ष असलेल्या डाव्यांना या देशाची अण्वस्त्रे नष्ट करायची आहेत. केंद्रामध्ये इंडिया आघाडीचे सरकार सत्तेमध्ये आले तर त्यातील प्रत्येक जण विशिष्ट काळासाठी आपआपसांत पंतप्रधानपद वाटून घेईल.’’

‘ईडी जोशात’

पंतप्रधान नरेंद्र मोदी यांनी सक्तवसुली संचालनालयाच्या (ईडी) कारवायांचा उल्लेख करताना तपास संस्थेने जप्त केलेला पैसा हा गरिबांच्या मालकीचा असल्याचा दावा केला. ‘‘ काँग्रेसच्या काळामध्ये ‘ईडी’ने फक्त ३५ लाख रुपयांची रोकड जप्त केली होती. आमची सत्ता येताच ‘ईडी’ ने २ हजार २०० कोटी रुपये जप्त केले, ’’ असे प्रतिपादन पंतप्रधान मोदी यांनी केले.