सारण (बिहार) : सोनपूर यात्रेमुळे प्रसिद्ध असलेल्या बिहारच्या सारण लोकसभा मतदारसंघामध्ये राष्ट्रीय जनता दलाच्या(आरजेडी) उमेदवार रोहिणी आचार्य यांच्यामुळे लालूप्रसाद यादव यांची प्रतिष्ठा पणाला लागली आहे. भाजपचे विद्यमान खासदार राजीव प्रताप रुडी आणि रोहिणी आचार्य यांच्या थेट लढतीमध्ये येथील जातकेंद्रीत राजकारणातील फॉरवर्ड – बॅकवर्ड (राजपूत विरुद्ध यादव) हा संघर्ष निर्णायक ठरणार आहे.

लालूप्रसाद यादव यांच्या राजकीय कारकिर्दीची सुरवातही याच भागातून झाली होती. हा पूर्वीचा छपरा लोकसभा मतदारसंघ होता. २००८ मध्ये त्याचे सारण मतदारसंघ असे नामकरण झाले. १९७७ मध्ये लालूप्रसाद यांनी छपरा मधून निवडणूक जिंकली होती. यावेळी त्यांनी कन्या रोहिणी आचार्य यांना सारण मधून निवडणुकीच्या मैदानात उतरविले आहे. दुसरीकडे, भाजपचे नेते आणि या भागातील प्रमुख राजपूत चेहरा म्हणून ओळखले जाणारे राजीव प्रताप रुडी हे देखील छपरामध्ये १९९६, १९९९ मध्ये जिंकले होते. त्यानंतर २०१४ पासून ते सारणचे प्रतिनिधित्व करत आहेत.

सारणमध्ये यादव आणि राजपूत समुदायाची तुल्यबळ लोकसंख्या लक्षात घेता निवडणूक नेहमीच जातकेंद्रीत होत आली आहे. साहजिकच आताही सारणमध्ये विकासाचा मुद्दा चर्चेत असला तरी राजपूत विरुद्ध यादव अशी येथील लढतीची वाटचाल सुरू झाली आहे. लालूंच्या आजारपणाच्या काळात रोहिणी आचार्य यांनी त्यांचे मूत्रपिंड लालू यांना दिले होते. त्या भावनिक मुद्द्यावरही रोहिणी आचार्य यांचा प्रचार होत आहे. येथील निवडणूक लालू केंद्रित असल्याने भाजपकडून लालूंच्या सत्ताकाळातील जंगलराजचा मुद्दा उपस्थित केला जात आहे.