सातारा : लोकसभेच्या (Satara Lok Sabha) निवडणुकीसाठी ज्येष्ठ नेते शरद पवार (Sharad Pawar) यांच्या राष्ट्रवादीकडून जाहीर झालेल्या दुसऱ्या यादीत साताऱ्याच्या उमेदवारीचा समावेश नसल्याने उमेदवारीबाबत सस्पेन्स कायम राहिला आहे. काल खासदार श्रीनिवास पाटील, आमदार शशिकांत शिंदे, सारंग पाटील यांनी सिल्वर ओकवर शरद पवार यांची भेट घेतली.

आजही श्रीनिवास पाटलांनी (Shrinivas Patil) लढण्यास नकार दिला. त्यामुळे साताऱ्याच्या उमेदवारीबाबत सस्पेन्स कायम राहिला आहे. सातारा लोकसभा मतदारसंघाबाबत सध्या हालचाली गतिमान झाल्या आहेत. महायुतीतून अद्याप खासदार उदयनराजेंच्या उमेदवारीबाबत अधिकृत घोषणा झालेली नाही. महाविकास आघाडीकडून राष्ट्रवादी काँग्रेस शरदचंद्र पवार पक्षाची दुसरी यादी जाहीर झाली. या यादीतही साताऱ्याचा समावेश नव्हता.

दिवसभर सातारा व माढा लोकसभेबाबत खासदार शरद पवार यांच्या सिल्वर ओक या निवासस्थानी खलबते सुरू होती. साताऱ्यातून खासदार श्रीनिवास पाटील, आमदार शशिकांत शिंदे, सारंग पाटील यांनी आज शरद पवार यांची भेट घेऊन चर्चा केली. खासदार श्रीनिवास पाटील यांनीच रिंगणात उतरावे, म्हणून मनधरणी करण्यात आली; पण आजही श्रीनिवास पाटील यांनी लढण्यास नकार दिला. त्यामुळे शरद पवारांनी साताऱ्याचा विषय पेंडिंग ठेवला आहे. माढाबाबत येत्या गुढीपाडव्याच्या मुहूर्तावर धैर्यशील मोहिते- पाटील यांचा प्रवेश होण्याची शक्यता आहे.