सोलापूर : आतापर्यंत सोलापूर जिल्ह्यातील नऊ लाख १९ हजार महिलांनी मुख्यमंत्री माझी लाडकी बहीण योजनेसाठी अर्ज केले आहेत. त्यापैकी जवळपास चार लाख ८६ हजार महिलांच्या खात्यात प्रत्येकी तीन हजार रूपये जमा झाले आहेत. उर्वरित चार लाख ३४ हजार महिलांच्या खात्यात ३१ ऑगस्ट रोजी पैसे जमा होतील, अशी माहिती अधिकाऱ्यांनी दिली. राज्यातील जवळपास एक कोटी महिलांना त्या दिवशी प्रत्येकी तीन हजार रूपये मिळणार आहेत.

मुख्यमंत्री माझी लाडकी बहीण योजनेसाठी सुरवातीला ‘नारीशक्ती दूत’ ॲपवरून सोलापूर जिल्ह्यातील सहा लाख १४ हजार ६७६ महिलांनी अर्ज भरले होते. त्यानंतर ते ॲप बंद करून शासनाने सुरू केलेल्या पोर्टलवरून तीन लाख चार हजार ६७० महिलांनी अर्ज केले आहेत. अजूनपर्यंत सव्वाचार लाखांहून अधिक महिलांना पैसे मिळालेले नाहीत.

योजनेसाठी अर्ज करण्याची मुदत ३१ ऑगस्टपर्यंत असून आता नव्याने प्राप्त झालेल्या ३० हजार अर्जांची पडताळणी सुरू आहे. उर्वरित सर्वच अर्जांना मंजुरी देण्यात आली असून ते अर्ज शासनाला सादर करण्यात आले आहेत. त्यांना आता प्रत्येकी तीन हजार रूपये मिळणार आहेत. तत्पूर्वी, यापूर्वी जिल्ह्यातील एक लाख २९ हजार महिलांच्या बॅंक खात्याला आधार लिंक नसल्याने त्यांना पैसे मिळालेले नाहीत. त्यांनी तातडीने आधारलिंक करून घ्यावे, असे आवाहन महिला व बालविकास अधिकारी प्रसाद मिरकले यांनी केले आहे. दरम्यान, यापुढे आता तीन हजार रूपये जमा झालेल्या लाडक्या बहिणींच्या बॅंक खात्यात दरमहा दीड हजार रुपयांप्रमाणे रक्कम जमा होणार आहे.

मुख्यमंत्र्यांच्या कार्यक्रमाची तारीख फिक्स नाही
नागपूर येथे ३१ ऑगस्ट रोजी मुख्यमंत्री एकनाथ शिंदे, उपमुख्यमंत्री अजित पवार व देवेंद्र फडणवीस यांच्या प्रमुख उपस्थितीत वनचपूर्तीचा महामेळावा होणार आहे. त्यानंतर १ किंवा २ सप्टेंबर रोजी त्यांच्याच उपस्थितीत सोलापुरात मेळावा होणार असल्याचे सांगण्यात आले. कार्यक्रमासाठी जिल्हाभरातून लाडक्या बहिणींना एसटीतून आणले जाणार असून त्यासाठी राज्य परिवहन महामंडळाकडून ४०० बसगाड्या घेतल्या जाणार आहेत. पण, कार्यक्रमाची तारीख निश्चित नसल्याने महामंडळाकडूनही गाड्यांचे नियोजन अजून झालेले नाही.