विधानसभेचे विरोधीपक्ष नेते अजित पवार यांच्या विरोधात पुण्यातील खडकी पोलिस ठाण्यात तक्रार दाखल करण्यात आली आहे. पुण्यातील भाजप नेते रवींद्र साळगावकर यांनी अजित पवार यांच्याकडून आपल्या जीवाला धोका असल्याचे या तक्रारीत म्हटले आहे. याबद्दल अजित पवार यांनी प्रतिक्रिया दिली आहे. (Complaint Against Ajit Pawar)

अजित पवार म्हणाले की, कोणामुळे कोणाच्या जीवाला धोका असेल तर त्याला संरक्षण मिळालं पाहीजे. ज्यांनी तक्रार केली त्याला पोलिसांनी आणि सरकारने संरक्षण द्यावं. जर त्याच्यात गंभीरता असेल तर स्टेनगन सहित त्याला संरक्षण द्यावं.

पुढे बोलताना अजित पवार म्हणाले की, मी कायदा सुव्यवस्था, संविधान पाळणारा माणूस आहे. माझ्याकडून धोका असण्याचं काही कारण नाही. राजकीय धोका असू शकतो पण फिजीकल धोका असू शकत नाही असेही अजित पवार म्हणाले. दरम्यान या प्रकरणात पोलिसांनी कोणत्याही प्रकारचा गुन्हा दाखल करून घेतलेला नाही. मात्र साळगावकर यांनी त्यांच्या लेटरहेडवर लिहून दिलेली तक्रार पोलिसांनी स्वीकारली आहे.

हेही वाचा - सामान्यांचा पैसा सुरक्षित ठेवण्यासाठीच Virtual Currency करकक्षेत

तक्रारीत काय म्हटलंय...

साळगावकर यांनी दिलेल्या तक्रारीत म्हटलंय की, पुण्यातील गणेशखिंड रस्त्यावर ई स्क्वेअरच्या समोर एक प्लॉट आहे. या प्लॉटची मोजणी करण्यासाठी अजित पवार यांनी दबाव आणला आहे. अर्थात ही मोजणी करता येत नाही. तर या प्लॉटच्या फाइलवर पवारांचं नाव आहे आणि मी याची माहिती घेतोय याला विरोध करतोय. त्यामुळे अजित पवार यांच्यापासून माझ्या जीवाला धोका असल्याचं त्यांनी म्हंटलं आहे.