आगामी लोकसभा निवडणुकांच्या पार्श्वभूमीवर सर्वच पक्षांनी मोठी तयारी सुरू केली आहे. भाजप, काँग्रेस, मनसे या पक्षांसह अजित पवार गटानेही निवडणुकांच्या पार्श्वभूमीवर कंबर कसली आहे. महायुतीत लोकसभेच्या नऊ जागांसाठी अजित पवार गट आग्रही असल्याची माहिती आहे.

राष्ट्रवादीकडे आत्ता बारामती, सातारा, रायगड, शिरूर हे मतदारसंघ आहेत. तर या चार मतदारसंघा व्यतिरिक्त धाराशिव, परभणी, दक्षिण मुंबई, भंडारा गोंदिया आणि छत्रपती संभाजीनगरचा जागेसाठी अजित पवार गट आग्रही असल्याची माहिती आहे.

संभाव्य उमेदवारांची नावे

• १) बारामती - सुनेत्रा पवार

• २) सातारा - रामराजे नाईक निंबाळकर

• ३) रायगड - सुनिल तटकरे

• ४) शिरूर - सध्या शिंदे गटात असणारे या मतदार संघातील माजी खासदार शिवाजीराव आढळराव पाटील

• ५) दक्षिण मुंबई - काँग्रेस मधील बडा चेहरा

• ६) परभणी- राजेश विटेकर

• ७) भंडारा गोंदिया - प्रफुल्ल पटेल

• ८) धाराशिव - राणा जगजितसिंह (सध्याचे भाजप आमदार)

• ९) छत्रपती संभाजीनगर - सतीश चव्हाण

अजित पवार गटाला हवाय सत्तेत समान वाटा

राष्ट्रवादी अजित पवार गटाचे आमदार व सरकारमधील मंत्री छगन भुजबळ यांनी अनेकदा माध्यमांशी बोलताना यासंदर्भात अजित पवार गटाची भूमिका स्पष्ट केली आहे. अजित पवार गटाला सत्तेत समान वाटा मिळायला हवा, अशी भूमिका छगन भुजबळ यांनी माध्यमांशी बोलताना अनेकदा व्यक्त केली आहे.

“शिंदे गटाला जेवढ्या जागा मिळतील, तेवढ्याच जागा आम्हाला मिळाव्यात. यावर सविस्तर चर्चा होईल. त्यांचेही ४०च्या आसपास आमदार आहेत. आमचेही ४०च्या आसपास आमदार आहेत. त्यामुळे त्यांना जे काही मिळेल, जेवढी मंत्रीपदं मिळतील तेवढीच आम्हालाही मिळावीत. त्यांना जेवढ्या खासदारकीच्या जागा मिळतील, तेवढ्या आम्हालाही मिळाव्यात. यात काही चूक आहे असं मला वाटत नाही”, असं छगन भुजबळ म्हणाले आहेत.