Mumbai Political News : अजित पवारांनी बंड केल्यानंतर राष्ट्रवादी काँग्रेस पक्षामध्ये फूट पडली आहे. दोन्ही गटांकडून आज बैठक बोलावण्यात आलेली असून कुणाकडे किती संख्याबळ आहे, हे काही वेळात स्पष्ट होणार आहे.

अजित पवार यांच्याकडे ४४ आमदारांचं संख्याबळ असल्याचं सांगण्यात येत आहे. 'टीव्ही ९'ने यासंदर्भातील वृत्त दिलं आहे. तर शरद पवार यांच्याकडे केवळ ११ आमदारांचं पाठबळ असल्याचं सांगण्यात येतेय. अजित पवारांकडे विधानसभेचे ४२ आणि विधान परिषदेचे २ आमदार असल्याचं सूत्रांच्या हवाल्याने सांगण्यात आलेलं आहे.

महत्त्वाचं म्हणजे अजित पवार गटाने ४४ आमदारांकडून प्रतिज्ञापत्र घेतलं असून त्यांना आजच्या बैठकीसाठी व्हिप लागू होणार आहे. आज मुंबईतल्या एमईटी कॉलेजमध्ये अजित पवार गटाच्या बैठकीचं आयोजन करण्यात आलेलं आहे. नेमके किती आमदार उपस्थित राहतात, हे काही वेळात कळेलच.

दुसरीकडे शरद पवार गटाकडे ११ आमदार असल्याचं सांगितलं जात असलं तरी प्रत्यक्षात वाय.बी. सेंटरमध्ये किती आमदार हजर राहतात, हे पाहाणं औत्सुक्याचं ठरेल. शरद पवार गटाचे प्रतोद जितेंद्र आव्हाड यांनी ५३ आमदारांना व्हिप जारी केला आहे. प्रदेशाध्यक्ष जयंत पाटील यांच्या दाव्यानुसार अजित पवार गटाकडे केवळ ९ आमदार आहेत. खरी परिस्थिती काही वेळात समोर येईल.