राष्ट्रवादीचे नेते अजित पवार यांनी केलेल्या बंडानंतर राष्ट्रवादी पक्षात उभी फूट पडली आहे. अजित पवारांनी राष्ट्रवादीच्या आठ आमदारांसह मंत्रिपदाची शपथ घेतल्यानंतर आता शरद पवार मैदानात उतरले आहेत. राष्ट्रवादी पक्षात झालेल्या बंडानंतर शरद पवार संपूर्ण राज्यात दौरा करणार आहेत.

शरद पवार यांच्या महाराष्ट्र दौऱ्याला शिवनेरीपासून सुरुवात होणार आहे तर दौऱ्याचा शेवट रायगड येथे होणार आहे.

संपूर्ण महाराष्ट्रात शरद पवार यांचा झंझावाती दौरा पाहायला मिळणार आहे. अजित पवारांसोबते शपथ घेतलेल्या आठ आमदारांपैकी एक असलेले दिलीप वळसे पाटील यांच्या मतदारसंघात शरद पवारांची पहिली जाहीर सभा होणार आहे. तर दुसरी सभा ही धनंजय मुंडे यांच्या परळी मतदारसंघात होणार आहे. काही नेत्यांच्या कारवाईमुळे राष्ट्रवादीला बळ देण्यासाठी आणि कार्यकर्त्यांना बळ देण्यासाठी आपण राज्यव्यापी दौरा सुरू केल्याचे शरद पवार यांनी सांगितले आहे.

अजित पवार यांनी काल मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या उपस्थितीत उपमुख्यमंत्रपदाची शपथ घेतली. त्यांच्यासोबत राष्ट्रवादीचे इतर आठ आमदार देखील होते. यानंतर शरद पवार यांनी आम्ही न्यायालयीन लढाई लढणार नाही तर आम्ही जनतेच्या न्यायालयात जाऊ अशी भुमिका जाहीर केली होती.

त्यानंतर दुसऱ्याच दिवशी शरद पवार घराबाहेर पडले होते. आज त्यांनी कराड येथे माजी मुख्यमंत्री यशवंतराव चव्हाण यांच्या समाधीस्थळाला भेट दिली. यावेळी त्यांनी जाहीर सभा देखील घेतली आता त्यानंतर त्यांनी संपूर्ण महाराष्ट्राच्या दौऱ्याची घोषणा केली आहे.