पुणे, ता. ३० ः ‘‘राजकारणामध्ये आकड्यांची जुळवाजुळव महत्त्वाची आहे. १४५ हा आकडा कोणताच राजकीय पक्ष स्वतःच्या ताकदीवर मिळवू शकत नाही. राष्ट्रवादीचा नेता नेहमीच निवडणुकीतून ठरला आहे. पक्षातील आमचे सर्व निर्णय शरद पवार हेच घेतात,’’ असे विरोधी पक्षनेते अजित पवार यांनी रविवारी स्पष्ट केले. राष्ट्रवादी काँग्रेसचे प्रदेशाध्यक्ष जयंत पाटील यांच्या ‘मुख्यमंत्री राष्ट्रवादीचाच’ या विधानावर पवार यांनी आपली भूमिका स्पष्ट केली.

खराडी येथील क्रांतिज्योत महिला प्रतिष्ठानच्या वतीने कबड्डी स्पर्धेच्या बक्षीस वितरणाला पवार यांनी उपस्थिती लावली. याप्रसंगी खासदार सुनील तटकरे उपस्थित होते. या वेळी पवार यांनी पत्रकारांशी संवाद साधला.

जयंत पाटील यांनी कऱ्हाड येथील कार्यक्रमात ‘पुढे राष्ट्रावादीचाच मुख्यमंत्री होईल’ असे विधान केले होते. त्यावर पवार यांनी ‘जयंतराव पाटील यांच्या तोंडात साखर पडो’ अशी टिपण्णी करीत आपली भूमिका मांडली. ते म्हणाले, ‘‘निवडणुकांना सामोरे जाणे आणि तिथे सर्वाधिक जागा कशा निवडून येतील हा आमचा प्रयत्न असेल.

राजकारणात आकड्यांची जुळवाजुळव महत्त्वाची असते. १४५ हा आकडा राजकीय पक्ष स्वतःच्या ताकदीवर मिळवू शकत नाही. राष्ट्रवादी काँग्रेस पक्षाचा नेता नेहमी निवडणुकीतून ठरला आहे. असा कुठलाही निर्णय शरद पवार यांनी घेतलेला नाही. पवार यांनी २२ वर्षांत नेता निवडण्यासाठी लोकशाही पद्धत वापरली आहे.’’

पुस्तकाचे प्रकाशन तरी होऊ द्या!

शरद पवार यांच्या ‘लोक माझे सांगाती’ या पुस्तकाच्या पुढील भागाचे लवकरच प्रकाशन होणार आहे. त्यामध्ये महाविकास आघाडी सरकार स्थापनेपासून बऱ्याच घटनांवर ऊहापोह केला आहे. याबाबत पवार यांना प्रश्‍न विचारल्यानंतर त्यांनी ‘‘आधी पुस्तकाचे प्रकाशन होऊ द्या, मग जनतेला ते कळू द्या, त्यानंतर मत मांडू,’’ असे उत्तर दिले.