नरेंद्र मोदी यांच्या नेतृत्त्वाखाली एनडीए सरकारचा आज तिसऱ्यांदा शपथविधी होत आहे. यामध्ये महाराष्ट्रातून 6 खासदार मंत्रीपदाची शपथ घेणार आहेत. यात नितीन गडकरी, रामदास आठवले, मुरलीधर मोहोळ, प्रताप जाधव, पीयुष गोयल आणि रक्षा खडसे हे मंत्री म्हणून शपथ घेणार आहेत.

दरम्यान मंत्री म्हणून शपथ घेणाऱ्या खासदारांमध्ये अजित पवार यांच्या राष्ट्रवादीला एकही मंत्रीपद मिळाले नसल्याचे स्पष्ट झाले आहे. त्यामुळे याबाबत राज्यासह देशाच्या राजकारणात उलट सुलट चर्चा सुरू झाली आहे.

सुरुवातील प्रफुल पटेल आणि सुनील तटकरे दोघांनाही मंत्रीपद पाहिजे म्हणून त्यांच्या वाद झाल्याच्या चर्चा सुरू झाल्या होत्या. त्यानंतर भाजप राष्ट्रवादीला कॅबिनेट मंत्रीपद देण्यास नकार देत असल्याच्या बातम्या येत होत्या.

दरम्यान, राष्ट्रवादी काँग्रेसचे अध्यक्ष अजित पवार यांनी नुकतीच पत्रकार परिषद घेत राष्ट्रवादीला नव्या सरकारच्या मंत्रीमंडळात का स्थान मिळाले नाही ते सांगितले.

काय म्हणाले फडणवीस?

यापूर्वी उपमुख्यमंत्री आणि भाजप नेते देवेंद्र फडणवीस म्हणाले होते की, राष्ट्रवादी जिंकलेल्या जागांच्या हिशोबाने त्यांना एक राज्यमंत्रीपद देऊ केले होते. त्यांच्याकडून प्रफुल पटेल यांना संधी देण्याचा निर्णय घेण्यात आला होता. पण, पटेल माजी केंद्रिय कॅबिनेट मंत्री असल्याने त्यांना राज्यमंत्रीपद देणे योग्य वाटत नाही म्हणत राष्ट्रवादीने आज शपथ घेण्यास नकार दिला आहे. पण पुढील काही काळात मंत्रीमंडळाचा विस्तार होईल तोपर्यंत राष्ट्रवादी थांबायला तयार आहे. म्हणून त्यांच्याकडून कोणीही आज मंत्रीपदाची शपथ घेणार नाही.

अजित पवार काय म्हणाले?

नुकत्याच घेतलेल्या पत्रकार परिषदेत अजित पवार म्हणाले, मंत्रीपद प्रफुल पटेलांना द्यायचे की सुनील तटकरेंना द्यायचे याबद्दल आमच्यामध्ये कोणताही वाद नाही. आम्ही सर्वांनी मिळून प्रफुल पटेलांचे नाव निश्चित केले आहे. भाजपने आम्हाला राज्यमंत्रीपद देऊ केले होते. पण, प्रफुल पटेल यांनी यापूर्वी कॅबिनेट मंत्री म्हणून काम केले असल्यामुळे त्यांना पुन्हा राज्यमंत्रीपद देणे चुकीचे वाटते.

काल आमची अमित शहा, राजनाथ सिंह आणि जेपी नड्डा यांच्याशी चर्चा झाली. त्यामध्ये आम्ही त्यांना सांगितले की, आम्हाला द्यायचे असेल तर कॅबिनेट मंत्रीपद द्या त्यासाठी आमची थांबण्याची तयारी आहे.