मुक्ताईनगर : राष्ट्रवादी काँग्रेसचे नेते एकनाथ खडसे केंद्रीय गृहमंत्री अमित शहा यांची शरद पवार यांच्यासह भेट घेणार होते. त्यासाठी खडसे दिल्लीलाही गेले होते, पण शहांची भेट होऊ शकली नाही. केवळ फोनवरुनच त्यांच्याशी बोलणं झालं, अशी माहिती खुद्द खडसे यांनी दिली आहे. तसेच घरवापसीच्या चर्चेवरही त्यांनी भाष्य केलं आहे. (Amit Shah Eknath Khadse meeting Khadse said everything)

खडसे म्हणाले, दर महिन्याला मी दिल्लीला जातो. शहा यांच्याकडे माझं व्यक्तिगत आणि सार्वजनिक काम होतं. त्यामुळं मला त्यांची भेट घ्यायची होती. याबाबत मी शरद पवार यांची चर्चा केली होती. त्यानंतर शरद पवारांनी स्वतःच मला सांगितलं की, मी पण तुमच्यासोबत येतो. शरद पवार आणि मी दिल्लीला जाऊन आलो पण अमित शहा यांची भेट होऊ शकली नाही. पण भविष्यात शरद पवार आणि मी असे दोघेजण अमित शहा यांची भेट घेणार आहोत, याची अपॉईंटमेंट शरद पवार घेणार आहेत.

मी भाजपत जाणार असल्याच्या सर्व चर्चा निराधार आहेत. भाजपत मी ४० वर्षे काढले त्यावेळी मी खूप कष्ट केले त्याची भाजपला मदतच झाली. पण मधल्या काळात मला असं वाटलं की भाजपत माझ्यावर अन्याय होतोय किंवा मला अडचणीत आणण्याचा प्रयत्न होतोय. त्यामुळं मी भाजपतून बाहेर पडलो आणि नंतर तीन वर्षे मी भाजपपासून दूर होतो तेव्हा शरद पवारांनी मला आधार दिला. त्यांनी राष्ट्रपती कोट्यातून माझी विधानपरिषदेसाठी शिफारस केली पण ती नियुक्ती होऊ शकली नाही. नंतर त्यांनी निवडून आणलं त्यामुळं ज्या पक्षानं मला राजकारणात पुन्हा सक्रीय केलं तो पक्ष सोडून पुन्हा भाजपत जाण्याचा प्रश्नच येत नाही. त्यामुळं शरद पवारांचं नेतृत्व मी मान्य केलं आहे. सहा वर्षानंतर भाजपत जाण्याचा विचारावर ते म्हणाले, सहा वर्षानंतर आपण राजकारणात असू नसू सांगता येत नाही. त्यामुळं या चर्चांना अर्थ नाही.

देशात एकाच घरात दोन व्यक्ती वेगळ्या पक्षात असल्याचं नवीन नाही. त्यामुळं ज्याच्या त्याच्या विचारधारा घेऊन तो व्यक्ती चालत असतो. जी विचारधारा आपण स्विकारली ती आपण पुढे घेऊन चाललं पाहिजे. रक्षाताई त्यांचं काम करतात मी माझं काम करतो. आमच्यामध्ये अजून तरी काही वाद निर्माण झालेला नाही, असंही त्यांनी यावेळी यासांगितलं.