मुंबई : भारतीय जनता पक्ष आणि शिवसेना यांच्यातील वाक् युद्ध संपायला तयार नसल्याचे दिसत आहे. शिवसेना जन्म सन १९६६ साली झाला. तर शिवसेनेचे इतिहासाचार्य खा. संजय राऊत (Sanjay Raut) यांचा जन्म सन १९६१ साली झाला. त्यामुळे जन्मापुर्वीचा इतिहास इतिहासाचार्यांना माहिती नसावा म्हणून सांगतो, असा टोला भाजप (BJP) आमदार आशिष शेलार (Ashish Shelar) यांनी शिवसेना खासदार संजय राऊत यांना आज मंगळवारी (ता.२५) लगावला आहे. (Ashish Shelar Attack On Shiv Sena Leader Sanjay Raut Over History)

पुढे आपल्या ट्विटमध्ये ते म्हणतात, आमचे दोन नगरसेवक श्री.कानिटकर आणि कोरडे हे १९५७ साली मुंबईत निवडून आले. तर सन १९६७ ला हशु अडवाणी चेंबूरमधून विधानसभेत आमदार म्हणून निवडून गेले. तुमचे पहिले आमदार वामनराव महाडिक १९७० साली परळमधून जे निवडून आले तेही आमच्या पाठींब्यावर. त्यामुळे उगाच सोईने इतिहास उगळू नका, असा सल्ला शेलार यांनी राऊत यांना दिला. वंदनीय हिंदुहृदयसम्राट बाळासाहेब ठाकरे यांच्या शिवसेनेसोबत हिंदुत्ववाच्या विचारांसाठी युतीत 'आम्ही गर्व से कहो' म्हणत होतो.

आज पक्षप्रमुख उद्धव ठाकरे यांच्या शिवसेनेला (Shiv Sena) मात्र या जाज्वल्य इतिहासाच्या फुलांचे निर्माल्य झाले वाटतेय! इतिहासाला अर्थ केवढा जाच्यात्याच्या समजूती एवढा!, या शब्दांत इतिहासावरुन त्यांनी राऊतांचा समाचार घेतला.