शिवसेना आणि भाजपमधील वाद चिघळत असतानाच आता 'द काश्मीर फाइल्स' या चित्रपटावरून सेनेने मोदी सरकारवर निशाणा साधण्यास सुरुवात केली आहे. मोदीजी, पाकव्याप्त काश्मीर पुन्हा हिंदुस्तानाला कधी जोडत आहात असा प्रश्न शिवसेना नेते आणि खासदार संजय राऊत (Sanjay Raut) यांनी पंतप्रधान ( Narendra Modi) यांना विचारला आहे. यावर भाजपचे खासदार अतुल भातखळकर (Atul Bhatkhalkar) यांनी संजय राऊत यांच्यावर टीकास्त्र सोडले आहे. 'द काश्मीर फाईल्स' हा चित्रपट वादाच्या भोवऱ्यात सापडला आहे. यावर राजकीय नेत्यांनी मते मांडण्यास सुरुवात केली आहे. अनेक भाजप शासित राज्यांमध्ये हा चित्रपट टॅक्स फ्री करण्यात आला आहे.

अतुल भातखळकरांनी संजय राऊत यांच्यावर निशाणा साधला. ते म्हणतात, मोदीजी, पाकव्याप्त काश्मीर पुन्हा हिंदुस्थानला कधी जोडत आहात? इति संजय राऊत उवाच. मोदीजी करतीलच, तुम्ही तुम्हाला झेपतेय तेवढंच बोला. औरंगाबादचे संभाजीनगर कधी करता आहात ते आधी सांगा असा सवाल भातळकरांनी विचारला आहे.

महाविकास आघाडीवर टीका करताना भातखळकर म्हणाले, वसुलीबाज शिलेदारांच्या काळ्या पैशाचा छडा केंद्रीय यंत्रणांना लागला आहे. त्याच्या झळा आपल्यापर्यंत येणार या कल्पनेने साहेबांचा तोल गेलाय. जनतेची लूट पचणार नाही. सर्वांचा हिशोब होणार असा सूचक इशारा आघाडीला दिला.