अयोध्या दौऱ्यावरून मागील काही दिवसांपासून राज्याचे राजकारण चांगलंच तापलं आहे. मनसे, शिवसेना आणि कॉंग्रेसच्या अयोध्या वारीच्या घोषणेनंतर अनेक राजकीय घडामोडींनी वेग घेतला आहे. मनसेप्रमुख राज ठाकरे यांनी आयोध्येला जाण्याचा निर्णय घेतल्यानंतर भाजप खासदार ब्रिजभूषणसिंह यांनी त्यांना विरोध दर्शवला. राज ठाकरे यांनी उत्तर भारतीयांची माफी मागावी आणि अयोध्येत पाऊल ठेवावे अशी मागणी त्यांनी केली. दरम्यान, आता मंत्री बच्चू कडूनींही अयोध्या वारी करणार असल्याचे जाहीर केले आहे. अमरावतीतील एका कार्यक्रमात बोलताना त्यांनी ही घोषणा केली आहे. (Bacchu Kadu Ayodhya Tour)

राज्यातील मनसे, शिवसेना आणि कॉंग्रेसने अयोध्यावारी जाहीर केल्यानंतर आता बच्चू कडू यांनीही अयोध्याला जाणार असल्याचं स्पष्ट केलं आहे. अमरावती बडनेरा येथे बोलत असताना त्यांनी ही घोषणा केली आहे. हिंदु मुस्लीम ऐक्यासाठी आम्ही भारताचा तिरंगा घेऊन अयोध्याला जाणार असल्याचे त्यांनी सांगितलं आहे.

ते म्हणाले, मागील काही दिवसांपासून राज्यातील अनेक राजकर्त्यांनी अयोध्या दौऱ्याची घोषणा केली. आम्हीही अशाच प्रकारचा अयोध्या दौरा करणार असून त्यासाठी तिरंगा यात्रेचे अयोजन करत आहोत. तिरंगा हे हिंदुस्थानच्या एकतेचे प्रतिक आहे. त्यामुळे देशातील हिंदु-मुस्लिम ऐक्य एकजुटीने रहावे यासाठी अयोध्याला जाणार असल्याचे त्यांनी स्पष्ट केलं आहे.

दरम्यान, मागील काही दिवसांपासून राज्यात मशिदीवरील भोंगे काढण्याचा वाद उफाळून आला आहे. यानंतर राजकारण चांगलंच ढवळून निघालं आहे. अमरावतीतील बडनेरा येथे अयोध्या दौरा करणार असल्याचे वक्तव्य बच्चू कडू यांनी केलं आहे. बच्चू कडू यांनी हिंदू-मुस्लिम ऐक्यासाठी आम्ही भारताचा तिरंगा घेऊन आयोध्या जाणार असल्याचं त्यांनी स्पष्ट केलं आहे.