मुंबईः मागच्या चार महिन्यांपासून रखडलेला पालकमंत्रीपदाचा तिढा सुटलेला आहे. राज्यातल्या १२ जिल्ह्यांना नवीन पालकमंत्री मिळालेले आहेत. चंद्रकांत पाटील यांच्याकडून पुणं काढून घेऊन त्यांच्याकडे अमरावती आणि सोलापूर जिल्ह्याचं पालकमंत्रीपद देण्यात आलंय.

दुसरीकडे नाशिक, सातारा आणि रायगड जिल्ह्याच्या पालकमंत्रीपदाबाबत सरकारने कुठलाही निर्णय घेतला आहे. या पार्श्वभूमीवर मागील अनेक महिन्यांपासून मंत्रिपदासाठी इच्छूक असलेले शिवसेनेचे प्रतोद भरत गोगावले यांनी मंत्रिपदासाठी अजूनही इच्छूक असल्याचं सांगून आशावाद व्यक्त केला आहे. 'ते टीव्ही ९ मराठी'शी बोलत होते.

भरत गोगावले म्हणाले की, रायगड आणि सातारा जिल्ह्यांच्या पालकमंत्रीपदाबाबत मुख्यमंत्री आणि दोन्ही उपमुख्यमंत्री हे योग्य निर्णय घेतील. रायगड सध्या उदय सामंतांकडे आहे म्हणजे आमच्याकडेच आहे. त्यामुळे अचडणीची बाब नाहीये.

उदय सामंताकंडे पहिल्यापासूनच रायगडचं पालकमंत्रीपद आहे. जोपर्यंत आमची वर्णी लागत नाही तोपर्यंत पालकमंत्रीपद उदय सामंत यांच्याकडे राहील.

गोगावले पुढे म्हणाले की, मंत्रिपदासाठी आमची धावपळ सुरुच आहे. योग्य वेळेला निर्णय होईल. मुख्यमंत्री आणि उपमुख्यमंत्री यांच्याकडे हे सोपवलेलं आहे. अजित पवार यांना पुण्याचं पालकमंत्रीपद दिलेलं आहे. त्यामुळे ते रायगडचा दावा कशाला करतील? याबाबत दोन्ही उपमुख्यमंत्री आणि मुख्यमंत्री योग्य तो निर्णय घेतील.

''मी मंत्रीच झालो नाही तर पालकमंत्री कसा होणार? मंत्रिपद मिळेपर्यंत पालकमंत्रीपद राखून ठेवलेलं आहे. विचारविनिमय सुरु आहे. योग्य तेच घडेल.. नवरात्रीमध्ये देवीच्या मनात असेल तर तेच घडेल'' असं सूचक विधान भरत गोगावले यांनी केलेलं आहे.

माझ्यासाठीच पालकमंत्रीपदाबाबत निर्णय झाला नसून ते पद राखून ठेवलंय, अशा आशयाचं विधान भरत गोगावलेंनी केलंय.