राज्यात सत्तांतर झाल्यापासून विरोधी आणि सत्ताधारी पक्षातील नेते पक्षांतर करताना दिसत आहेत. अशातच काही नेते पक्ष सोडण्याच्या भूमिकेत आहेत. तर काही नेते पक्ष सोडणार असल्याचे दावे अनेक नेते करताना दिसून येतात. अशातच आता महाराष्ट्राच्या राजकारणामध्ये पुन्हा एकदा राजकीय भूकंप होण्याची शक्यता आहे. काँग्रेसचे दोन आमदार पक्षाची साथ सोडणार असल्याची माहिती समोर आली आहे.

काँग्रेसचे 2 आमदार भाजप-शिवसेनेमध्ये नाही तर चंद्रशेखर राव यांच्या बीआरएस या पक्षात जाणार असल्याची माहिती समोर आली आहे. याशिवाय एक अपक्ष आमदार आणि आपचे नेतेही चंद्रशेखर राव यांच्या पक्षात प्रवेश करणार असल्याची माहिती माजी खासदार हरिभाऊ राठोड यांनी दिली आहे.

छत्रपती संभाजी नगरमध्ये पार पडणाऱ्या सभेमध्ये आपचे अनेक नेते आणि कार्यकर्ते चंद्रशेखर राव यांच्या पक्षात प्रवेश करणार असल्याचा गौप्यस्फोट हरिभाऊ राठोड यांनी केला आहे.

तेलंगणाचे मुख्यमंत्री चंद्रशेखर राव यांनी काहीच महिन्यांपूर्वी तेलंगणा राष्ट्रसमिती अर्थात टीआरएसचं नाव बदलून बीआरएस म्हणजेच भारत राष्ट्र समिती केलं आहे. चंद्रशेखर राव यांनी काहीच दिवसांपूर्वी चंद्रशेखर राव यांनी नांदेडमध्ये सभा घेत महाराष्ट्रातही प्रवेश केला आहे.

दरम्यान बीआरएसमध्ये प्रवेश करणारे काँग्रेसचे ते दोन आमदार कोण आहेत? याबाबत आता राजकीय वर्तुळात उलटसुलट चर्चा सुरू झाल्या आहेत. एकनाथ शिंदे यांच्या विश्वासदर्शक ठरावावेळी 13 आमदार गैरहजर राहिले होते, तेव्हापासून काँग्रेसच्या या आमदारांबाबत शंका उपस्थित केली जात आहे. याशिवाय मागच्या वर्षी जून महिन्यात झालेल्या विधानपरिषद निवडणुकीमध्येही काँग्रेसच्या आमदारांनी क्रॉस व्होटिंग केलं होतं, ज्यामुळे काँग्रेस उमेदवार चंद्रकांत हंडोरे यांचा पराभव झाला होता.