काही दिवसांपासून राज्यसभेच्या निवडणूकीवरून राज्यातील राजकीय वातवारण चांगलेच तापले होते. दरम्यान राज्यसभेचा निकाल लागला असून आता राजकीय पक्षांकडून एकमेकांवर आरोप-प्रत्यारोप केले जात आहेत, यादरम्यान भाजपचे नेते आशिष शेलार यांनी राज्यसभेचा निकालानंतर मुद्दे आणि गुद्दे असे म्हणत काही प्रश्न उपस्थित केले आहेत. (bjp Ashish Shelar critisize mva govt on rajya sabha election result)

शेलार यांनी ट्वीटरवर एक ट्वीट मालिका पोस्ट केली आहे. ज्यामध्ये त्यांनी शिवसेना-काँग्रेस यांच्यातील अंतर्गत वादावर बोट ठेवलं आहे, ते म्हणाले की, काँग्रेसने शिवसेनेला मदत केली नसल्याचे त्यांनी म्हटले आहे. भाजपाकडे 113 मतांचा कोटा असताना 123 मते कशी व कुठून आली? असा प्रश्नही त्यांनी यामध्ये उपस्थित केला आहे. शिवसेनेच्या प्रथम पसंतीचे उमेदवार संजय राऊत यांच्यापेक्षा भाजपाच्या धनंजय महाडिक यांची मते अधिक असल्याचे ते म्हणाले. पुढे त्यांनी नेत्यांची काळजी आणि शिवसैनिक वाऱ्यावर? असा सवाल शेलारांनी शिवसेनेला केला आहे.

MIM ची मते घेऊन औरंगजेबी युती अखेर केलीच, आता औरंगाबाद नामांतराचे काय? सपाची मते ही चालवून घेतली तेव्हा ह्रदयातला राम कुठे काढून ठेवला? असे म्हणत त्यांनी MIM ला भाजपची बी टीम म्हणणाऱ्यांना प्रतिप्रश्न केला आहे. महाराष्ट्रात संजय पवार हारतो आणि इम्रान प्रतापगढी जिंकतो, हे "प्रताप" महाराष्ट्र बघतोय, असा टोलाही शेलारांनी लगावला.

राज्यसभेच्या निवडणुकीचा निकाल जाहीर झाल्यानंतर सुरू झालेल्या राजकीय चर्चांवर भाष्य करताना त्यांनी, उघड मतदानात जे चित्र समोर आले त्याने एवढे बावचळलेत..विधानपरिषद निवडणूक गुप्त मतदानाने पार पडणार आहे, तेव्हा काय करणार? असा सवाल त्यांनी महाविकास आघाडीतील नेत्यांना केला आहे. अंतर्विरोधाचा तीन तिघाडा किती दिवस झाकणार? भाजप नेत्यांच्या घरातील तथाकथित अनधिकृत बांधकामे शोधण्यापेक्षा सरकारमधील फूट शोधण्याचा किमान समान कार्यक्रम राबवा!, असा सल्ला देखील त्यांनी दिला महाविकास आघाडीतील नेत्यांना दिला आहे.