मुंबई - रयत शिक्षण संस्थेच्या संचालक मंडळावरून शिवसेना (Shivsena) आमदार महेश शिंदेंनी (Mahesh Shinde) केलेल्या वक्तव्यावर आता वेगवेगळ्या प्रतिक्रिया येत आहेत. माझी उंची शरद पवार (Sharad Pawar) यांच्या उंचीपेक्षा दोन इंच लहान आहे असं त्यांनी म्हटलं होतं. यावर राष्ट्रवादी काँग्रसचे नेते जितेंद्र आव्हाड (Jitendra Awhad) यांनी आमदार महेश शिंदे यांनी आपला मेंदु तपासून पाहावा असं म्हटलं होतं. यावरच आता भाजप आमदार अतुल भातखळकर (Atul Bhatkhalkar) यांनी ट्विटरवरून टीका केली आहे.

भातखळकर यांनी ट्विटरवर सामना वृत्तपत्राच्या जुन्या अंकाचा फोटो टाकला आहे. त्याला बाळासाहेबांनी उंची व्यवस्थित मोजली होती असा कॅप्शन दिला आहे. यात सामनाच्या पहिल्या पानावर बाळासाहेब ठाकरेंचा सभेला संबोधित करत असलेला फोटो आहे. त्या बातमीचे शीर्षक ''निश्चयाचा महामेरु कसले, पवार तर सोनियांचे पायधरू' असे आहे.

याआधीही भाजपकडून बाळासाहेब ठाकरेंच्या भाषणाचे संदर्भ देऊन राष्ट्रवादी काँग्रेस, शरद पवार यांच्यासह शिवसेनेवर टीकास्र सोडले आहे. भातखळकर यांनी मुख्यमंत्री उद्धव ठाकरेंवरही टीका करणारे ट्विट केले आहे. त्यात म्हटलं की, घरी बसण्याचा निकष लावला तर महाराष्ट्राचे मुख्यमंत्री सर्वात मोठे आहेत. त्यांची कुणाशी तुलनाच होऊ शकत नाही. कुंभकर्णसुद्धा सहा महिन्यांनी जागा व्हायचा, हे कुणी तरी महाराष्ट्राच्या मुख्यमंत्र्यांना सांगण्याची गरज आहे.

मुख्यमंत्री बाहेर पडत नाहीत यावरून अनेकांनी टीका केली. त्यावर मुख्यमंत्री उद्धव ठाकरेंनी म्हटलं होतं की, मी मुख्यमंत्रीपदाच्या खुर्चीवर बसलो आहे. माझ्यावर वैयक्तिक टीका होतेय, या टीकेकडे शांतपणे पाहतोय. ज्याला दाखवायचं आहे त्याला मी त्याच वेळेला करून दाखवतो, येत्या निवडणुकीच्या तयारीला लागा. मी कामानेच माझी पोचपावती देतो.