मुंबई: दादरा नगर हवेलीमध्ये झालेल्या लोकसभा जागेच्या पोटनिवडणुकीत शिवसेनेचा विजय झाला आहे. या विजयाने शिवसेनेचा आत्मविश्वास दुणावला आहे. कारण महाराष्ट्राबाहेर पहिल्यांदाच शिवसेनेला असा विजय प्राप्त करता आला आहे. 13 राज्यात झालेल्या पोटनिवडणुकीमध्ये भाजपला धक्का बसेल असा निकाल समोर आला आहे. या निवडणुकीत काँग्रेसने चांगली कामगिरी केल्याचं दिसून आलंय. तेरा राज्यांतील लोकसभा आणि विधानसभा पोटनिवडणुकीतील निकाल त्यांनी दिवाळी साजरी करून नाचावे, असे लागलेले नाहीत. गुजरातच्या सीमेवरील प्रदेशात मोदींचे नाव न घेता, पोस्टरवर त्यांचे चित्र न लावता शिवसेना जिंकली व देगलुरला ‘मोदी मोदी’ करूनही भाजपला माती खावी लागलीये, असं शिवसेनेने म्हटंलय. तसेच दिल्ली दरवाजापर्यंत नक्कीच धडक मारु, असा निर्धारही शिवसनेने व्यक्त केला आहे.

शिवसेनेने पुढे म्हटलंय की, दिवाळीचे फटाके फुटू लागले आहेत. कुणाला दिवाळीनंतर बॉम्ब फोडायचे असतील तर ते फोडावेत. त्या बॉम्बमध्ये दारू शिल्लक आहे काय तेवढेच एकदा बघा. नाही तर हसे व्हायचे. दिवाळीचा सण आनंदाने, उत्साहाने साजरा करावा असा विजय महाराष्ट्राने मिळवला आहे. महाराष्ट्राच्या विजयाचे दमदार पाऊल देशपातळीवर पडले आहे. या पावलाखाली सर्व अमंगल, अन्याय चिरडून जाईल. महाराष्ट्र व जनतेची भरभराट होईल, अशा शुभेच्छाही शिवसेनेने दिल्या आहेत.

भारतीय जनता पक्षावर टीका करताना शिवसेनेचे मुखपत्र असलेल्या सामनाच्या अग्रलेखात म्हटलंय की, ऐन दिवाळीत भारतीय जनता पक्षाचे कंदील विझले आहेत. हा शुभशकुन नाही. आपणच अजिंक्य आणि अजेय आहोत या त्यांच्या अहंकारासही पोटनिवडणुकांच्या निकालांनी तडा गेला आहे.

दादरा-नगरच्या विजयाने शिवसेनेची, हिंदुत्ववाद्यांची,अन्यायाविरुद्ध लढणाऱ्यांची दिवाळी अधिक तेजोमय झाली. शिवसेना महाराष्ट्राबाहेर काय दिवे लावणार? असे प्रश्न ज्यांना पडत होते त्यांनी शिवसेना विजयाचे हे तेजस्वी दीप पाहायलाच हवेत, तसेच मुंबईतील ‘दादर’ ते ‘दादरा’ असा हा शिवसेनेचा प्रवास असल्याचंही म्हटलंय.

कुणाला दिवाळीनंतर बॉम्ब फोडायचे असतील तर ते फोडावेत. त्या बॉम्बमध्ये दारू शिल्लक आहे काय तेवढेच एकदा बघा. नाही तर हसे व्हायचे. दिवाळीचा सण आनंदाने, उत्साहाने साजरा करावा असा विजय महाराष्ट्राने मिळवला आहे. महाराष्ट्राच्या विजयाचे दमदार पाऊल देश पातळीवर पडले आहे. या पावलाखाली सर्व अमंगल, अन्याय चिरडून जाईल. महाराष्ट्र व जनतेची भरभराट होईल, हीच शुभेच्छा, असं शिवसेनेने म्हटलंय.