गेल्या काही दिवसांपासून अजित पवार हे भाजपसोबत जाणार असल्याच्या चर्चेला उधाण आलं आहे. आज अजित पवार यांनी आपले सासवडमधील सर्व कार्यक्रम अचानक रद्द केले त्यानंतरही चर्चेला उधाण आलं. तर दुसरीकडे भाजपचे प्रदेशाध्यक्ष चंद्रशेखर बावनकुळे आणि आशिष शेलार हे मोठे नेते दिल्लीला पोहोचल्यामुळे तर्क वितर्क लावण्यात येत आहेत. दरम्यान आता यावर बावनकुळे यांनी प्रतिक्रिया दिली आहे.

'भाजपच्या विचारधारेनुसार काम करणार असेल तर पक्षात कोणीही आलं तरी हरकत नाही. भाजपमध्ये सर्वांसाठी स्थान आहे. आमच्याकडे देश, देव, धर्माला मानणारे आले तर त्यांचं स्वागतच आहे. आमच्याकडे विचारधारेवर काम करावं लागतं' असं चंद्रशेखर बावनकुळे यांनी म्हटलं आहे.

बावनकुळे यांनी केलेल्या या वक्तव्यानंतर आता त्यांनी अजित पवार यांच्या भाजप प्रवेशाला ग्रीन सिग्नल दिला आहे का? असा प्रश्न याठिकाणी उपस्थित होत आहे.

राज्यात घडामोडींना वेग

राज्याच्या राजकारणात घडामोडींना वेग आला आहे. एकीकडे राष्ट्रवादीचे नेते आणि विरोधी पक्षनेते अजित पवार यांनी आज त्यांचे सर्व कार्यक्रम रद्द केले आहेत, तर दुसरीकडे भाजपचे दोन मोठे नेते तडकाफडकी दिल्लीला रवाना झाले आहेत.

राष्ट्रवादीचे नेते अजित पवार यांचे दिवसभरातील सर्व कार्यक्रम रद्द करण्यात आले आहे. अजित पवार यांचा आज पुणे दौरा ठरला होता, परंतु ते अद्याप मुंबईतच आहे, अशी माहिती आहे. दुसरीकडे राष्ट्रवादीचे अध्यक्ष शरद पवार आणि खासदार सुप्रिया सुळे बारामतीमध्ये आहे. अजित पवार यांचे अचानक सर्व कार्यक्रम रद्द झाल्याची राजकीय वर्तुळात चर्चांना उधाण आलं आहे.