भाजप नेते माजी खासदार किरीट सोमय्या यांच्या आक्षेपार्ह व्हिडिओ प्रकरणी मोठी अपडेट समोर आली आहे. या प्रकरणी मुंबई पोलिसांनी गुन्हा दाखल केला असून सोमय्या यांनी खाजगी वृत्तवाहिनी आणि अनिल थत्ते यांच्या विरोधात तक्रार दिली होती. त्यानंतर उत्तर प्रादेशिक सायबर पोलीस ठाण्यात गुन्हा नोंद करण्यात आला आहे. भा. दं. वि. ५०० (मानहानी) आणि माहिती तंत्रज्ञान कायद्याच्या कलम ६६(ई) आणि ६७ (अ) अंतर्गत या प्रमाणात गुन्हा नोंद करण्यात आला. मंगळवारी सोमय्या यांचा जबाब देखील नोंदवण्यात आला होता.

भाजप नेते आणि माजी खासदार किरीट सोमय्या यांचा एक व्हिडिओ काही दिवसांपूर्वी व्हायरल झाला होता. या प्रकरणाचा तपास करणाऱ्या गुन्हे शाखेने तपासादरम्यान जे काही आढळून आले त्या आधारे हा व्हिडिओ खरा असल्याचा दावा केला आहे. यात कोणत्याही प्रकारे छेडछाड किंवा मॉर्फ केलेले नसल्याचे गुन्हे शाखेने सांगितले होते.

विशेष म्हणजे हा व्हिडिओ समोर आल्यानंतर उपमुख्यमंत्री देवेंद्र फडणवीस यांनी विधानसभेत या प्रकरणाच्या चौकशीचे आदेश दिले होते. यानंतर, मुंबई पोलिसांच्या गुन्हे शाखेच्या पथकाने संपूर्ण व्हिडिओचे बारकाईने विश्लेषण केले आणि व्हिडिओ मॉर्फ केलेला नसल्याचे आढळून आले होते. हा व्हिडीओ खरा निघाला असताना हा व्हिडीओ कोणी आणि कोणत्या उद्देशाने व्हायरल केला याचा तपास पोलीसांकडून करण्यात आला.

एका मराठी वृत्तवाहिनीने भाजप नेते सोमय्या यांची आक्षेपार्ह व्हिडिओ प्रसारित केला. मराठी वृत्तवाहिनीनेही त्यांच्याकडे असेच आणखी व्हिडिओ असल्याचा दावा केला होता. गुन्हे शाखेने त्या वृत्तवाहिनीला पत्र लिहून त्या व्हिडिओंची मागणी केली होती, जेणेकरून तपास करता येईल. दरम्यान विधानसभा पावसाळी अधिवेशनादरम्यान या प्रकरणी मोठा गदारोळ झाल्याचे पाहयला मिळाले. ज्यामध्ये मुख्य विरोधी पक्षनेते अंबादास दानवे यांनी महाराष्ट्र विधानसभेत आठ तासांचा पेन ड्राइव्ह सादर केला, त्यानंतर गृहमंत्री फडणवीस यांनी या प्रकरणाच्या उच्चस्तरीय चौकशीचे आदेश दिले.