भारत हा हिंदुराष्ट्र होता हिंदुराष्ट्र आहे आणि हिंदुराष्ट्र राहिल... अशी पोस्ट भाजपच्या अधिकृत ट्विटर हँडलवरुन करण्यात आली होती. या ट्विटमुळे, भाजपमध्येच मतभेद दिसून येत आहेत. कारण भाजपचे ज्येष्ठ नेते सुधीर मुनगंटीवर यांनी, भाजपचा असा कोणताही अजेंडा नसताना, असं ट्विट कुणी आणि का केलं? हे समोर येईलच, असं वक्तव्य केलं आहे.

मुनगंटीवर यांच्या या प्रतिक्रियेमुळे भाजपच्या सोशल मीडिया सेलमधून अशी पोस्ट चुकून केली? की मुद्दाम केली गेली? अशी चर्चा आता सुरू झाली आहे. या पोस्टमुळे विरोधकांनी भाजपवर हल्लाबोल केला होता.

हिंदुराष्ट्र ही भाजपची अधिकृत भूमिका आहे का? असा प्रश्न विरोधकांनी केला आहे. भाजपच्या काही नेत्यांनी हिंदुराष्ट्र हीच आपली भूमिका असल्याची प्रतिक्रिया दिली होती. पण आज प्रदेशाध्यक्ष चंद्रशेखर बावनकुळेंनी हिंदुराष्ट्र म्हणजे बहुसंख्य हिंदूंचा देश, असा त्याचा अर्थ सांगितला आहे. तर दुसरीकडे सुधीर मुनगंटीवर यांनी तर हिंदुराष्ट्राचा अजेंडा, भाजपचा नाही, असं म्हणत, या ट्विटच्या चौकशीचे संकेत दिले आहेत.

काँग्रेसचे प्रदेशाध्यक्ष नाना पटोलेंची प्रतिक्रिया

विरोधकांनी भाजपवर या पोस्टनंतर टीका केली होती. भाजपाच्या या ट्विटनंतर महाराष्ट्र काँग्रेसचे प्रदेशाध्यक्ष नाना पटोले म्हणाले होते की, देशाच्या संविधानाला जे लोक मानत नाहीत. त्या लोकांकडून आणखी काय अपेक्षा केली भारताचं संविधान आहे. संविधान आहे म्हणूनच देवेंद्र फडणवीस राज्याचे उपमुख्यमंत्री झाले आहे. संविधान नसतं तर ते उपमुख्यमंत्री झाले नसते असं नाना पटोले काल म्हणाले होते.

ठाकरे गटाच्या उपनेत्या सुषमा अंधारेंची प्रतिक्रिया

ठाकरे गटाच्या उपनेत्या सुषमा अंधारे म्हणाल्या, भारत हे हिंदुराष्ट्र असेल आणि ते हिंदुराष्ट्रच मानायचे असेल तर या राज्यातील सर्व धर्माचे लोकं वाऱ्यावर सोडून द्यायचे असेल तर तो त्यांचा प्रश्न आहे. पण जर असंच असेल तर त्यांनी त्यांच्या पक्षाचे नाव भारतीय जनता पार्टी न ठेवता ते बदलून ते हिंदुस्तान जनता पार्टी करावे असा खोचक टोला लगावला आहे.