Narayan Rane on Ramdas Kadam : शिवसेना नेते रामदास कदम यांनी भाजपवर खरमरीत टीका केल्यानंतर देवेंद्र फडणवीसांकडून त्यांना उत्तर देण्यात आलेलं होतं. त्यानंतर शिवसेनेचे प्रवक्ते संजय शिरसाट यांनी फडवीसांना प्रत्युत्तर दिलं. हा वाद संपलेला नसून नारायण राणे यांनी रामदास कदम यांच्यावर सणसणीत टीका केली आहे.

काय म्हणाले होते रामदास कदम?

मंत्री रवींद्र चव्हाण यांच्याकडून माझ्या मुलाला त्रास दिला जातोय, असं म्हणत रामदास कदम यांनी भाजपवर टीका केली होती. भाजपमधील काही लोक अतिशय घृणास्पद काम करत आहेत. राज्यातल्या काही नेत्यांना मोदी-शाहांनी समज दिली पाहिजे. प्रत्येकालाच आपला पक्ष वाढवायचा असतो. त्यामुळे तुमच्यावर विश्वास ठेवून आलेल्यांचा केसाने गळा कापू नका, असा इशारा कदमांनी दिला होता.

देवेंद्र फडणवीसांचं उत्तर

आम्ही मित्रपक्षांचा कायम सन्मान करत आलेलो आहोत. भाजपकडे ११५ आमदारांचं संख्याबळ होतं तरीदेखील एकनाथ शिंदेंना आम्ही मुख्यमंत्री केलं. रामदास कदम यांना अशी विधानं करण्याची सवय असून ते टोकाचं बोलतात.

संजय शिरसाट काय म्हणाले?

शिवसेनेचे प्रवक्ते संजय शिरसाट यांनी फडणवीसांच्या प्रतिक्रियेला प्रत्युत्तर दिलं. ते म्हणाले की, एकनाथ शिंदे यांनी उठाव केला नसता तर १०५ जणांना विरोधी बाकावर बसावं लागलं असतं. मात्र शिंदेंमुळे ते सगळे सत्तेमध्ये आहेत आणि त्यांच्यामुळे एकनाथ शिंदे मुख्यमंत्री आहेत. या दोन्ही बाजू खऱ्याच आहेत.

नारायण राणेंचं ट्वीट

''आमचे मित्रपक्ष व सहकारी यांच्या गळ्यात हार पडावे , त्यांचा सन्मान व्हावा यासाठी भारतीय जनता पक्ष नेहमी कार्यरत असतो. आम्ही केसाने गळा कापत नाही. केसाने गळा कापणारे आता रानोमाळ फिरत आहेत. आपणच आपले नाव घेऊन काय उपयोग? जनमानसात आपले नाव असले पाहिजे. फांदीवर बसलेल्‍यांनी आव्‍हानाची भाषा करु नये, नाही तर आपल्‍याच फडफडीने फांदी तुटून राम राम म्‍हणण्‍याची वेळ येईल.'' असं खरमरीत उत्तर नारायण राणे यांनी रामदास कदम यांना दिलं आहे.