कॅबिनेट मंत्री नारायण राणे (Minister Narayan Rane) यांना मुख्यमंत्री उद्धव ठाकरे (Chief Minister Uddhav Thackeray) यांच्याबद्दल आक्षेपार्ह वक्तव्य केल्याबद्दल काल (बुधवारी) रत्नागिरीतून अटक करण्यात आली होती. यामुळे राज्यात काही ठिकाणी भाजप-सेनेचे कार्यकर्ते आक्रमक होत एकमेकांना भिडल्याचे पहायला मिळाले. त्यानंतर आता भाजपकडूनही मुख्यमंत्री उद्धव ठाकरे यांच्यावर गुन्हा दाखल करण्यात येणार असून मुख्यमंत्री ठाकरेंनी मुख्यमंत्री योगी आदित्यनाथ (Chief Minister Yogi Adityanath) यांच्याविरोधात आक्षेपार्ह्य वक्तव्य दसरा मेळाव्यात (Dasara Melava) केले होते. याच पार्श्वभूमीवर यवतमाळ येथील भाजप जिल्हाध्यक्ष नितीन भुतडा (BJP District President Nitin Bhutada) हे तक्रार दाखल करणार असल्याचे समजते.

नारायण राणे सध्या जन आशीर्वाद यात्रेच्या निमित्ताने महाराष्ट्राच्या दौऱ्यावर आहेत. सोमवारी रायगडमधील महाड येथे नारायण राणेंची पत्रकार परिषद झाली. यावेळी बोलताना राणेंनी, मुख्यमंत्री ठाकरेंचा एकेरी उल्लेख करत आक्षेपार्ह वक्तव्य केलं होतं. मुख्यमंत्र्यांनी स्वातंत्र्यदिनाच्या दिवशी केलेल्या भाषणावर टीका करताना राणेंनी हे विधान केलं होतं. 'त्या दिवशी नाही का? किती वर्षे झाली देशाला स्वातंत्र्य मिळून… अरे हिरक महोत्सव काय? मी असतो तर कानाखालीच चढवली असती,' असं राणे म्हणाले होते. या विधानमुळे काल संपूर्ण महाराष्ट्रात गदारोळ माजला होता. अनेक ठिकाणी शिवसैनिकांकडून दगडफेक करत निषेध नोंदविण्यात आला, तर दुसरीकडे राणेंच्या जामिनासाठी भाजपकडूनही प्रयत्न केले जात होते.

मात्र, काल (बुधवार) रात्री राणेंना जामीन मंजूर होताच भाजपकडून देखील मुख्यमंत्री ठाकरेंविरोधात जोरदार हालचाली सुरु झाल्या आहेत. यवतमाळ येथील भाजप जिल्हाध्यक्ष भुतडा हे उद्धव ठाकरे यांच्याविरोधात तक्रार दाखल करणार असल्याचे समजते. मात्र, याबाबत भाजपकडून अद्याप तसा कोणताही दुजारा मिळालेला नाही. त्यामुळे भुतडा कधी तक्रार दाखल करणार हे समजू शकले नाही. आता भाजपने ठाकरेंविरोधात वेगळी खेळी केल्याने उद्धव ठाकरे यांच्या अडचणीत वाढ होण्याची शक्यता आहे.