मुंबईः राष्ट्रवादी काँग्रेसच्या अजित पवार गटाचे नेते, मंत्री छगन भुजबळ हे भाजपच्या वाटेवर जाणार असल्याचं ट्वीट सामाजिक कार्यकर्त्या अंजली दमानिया यांनी केलं होतं. त्यानंतर त्यांनी शुक्रवारी आणखी एक गौप्यस्फोट करुन भाजप भुजबळांना ओबीसींचा देशव्यापी चेहरा बनवणार असल्याचं म्हटलं आहे.

'टीव्ही ९'शी बोलताना अंजली दमानिया म्हणाल्या की, मागील काही दिवसांपूर्वी मला एकाने सांगितलं होतं की, भाजप भुजबळांना ओबीसी फेस म्हणून प्रोजेक्ट करणार आहे. काल पुन्हा तेच कळलं आणि मला अतिशय व्यथित वाटलं. एकीकडे मनोज जरांगे हे साधे शेतकरी असून त्यांनी एवढा लढा दिला. मात्र भाजपला भुजबळांसारख्यांची गरज का पडावी? एक साधा ओबीसी नेते लढा देऊ शकला असता.. तसं न करता भ्रष्ट माणसाला भाजप मोठं करत आहे.

दमानिया पुढे म्हणाल्या, एकेकाळी भाजपनेच भुजबळांवर गंभीर आरोप केले होते. तेच आज त्यांना पक्षात घेऊ पाहात आहेत. जे लोक भाजपसोबत जातात त्यांना क्लिनचिट दिली जात आहे. शिखर बँकेच्या घोटाळ्यात अजित पवारांना क्लिनचिट आणि आणि रोहित पवारांची नऊ-नऊ तास चौकशी केली, असे प्रकार सुरु आहेत. तुम्ही भ्रष्टाचाऱ्यांवर कारवाई करा पण सगळ्यांना समान न्याय द्या.. असं त्या म्हणाल्या.

अंजली दमानिया यांचं ट्वीट

भुजबळ भाजपच्या वाटेवर?

एकेकाळी भुजबळांच्या भ्रष्टाचाराविरुद्ध जनहित याचिका करणारा भाजप त्यांना मोठा ओबीसी नेता बनवणार?

अशा भ्रष्ट माणसांना मोठं करणार, राजकारणासाठी?

कुठे फेडाल हे पाप

दरम्यान, मराठा आरक्षण लढ्याचे नेते मनोज जरांगे पाटील यांनी आरक्षणाचा लढा सुरु केल्यानंतर भुजबळांनी त्यांना कडाडून विरोध केला. मराठ्यांना ओबीसीतून आरक्षण मिळू देणार नाही, अशी त्यांनी भूमिका घेतली. त्यामुळे जरांगेंनी भुजबळांना अस्सल मराठवाडी भाषेत टार्गेट करायला सुरुवात केली. आरोप-प्रत्यारोपांच्या या फैरींमध्ये भुजबळ पुन्हा चर्चेत आले. त्यातच ते आता भाजपच्या वाटेवर असल्याच्या चर्चांना उधाण आलंय.