Nashik Bribe Crime News : लाचखोरी रोखण्यासाठी शासनस्तरावरून सातत्याने प्रयत्न केले जात असतानाही, लाचखोरीला आळा बसण्याऐवजी लाच घेण्याचे प्रमाण लक्षणीयरित्या वाढते आहे. यंदा वर्षभरात राज्यात लाचलुचपत प्रतिबंधक विभागाने ८०३ गुन्हे दाखल करीत १ हजार १७० आरोपींना जेरबंद केले आहे.

यात सर्वाधिक १६३ लाचखोरीचे गुन्हे नाशिक विभागात दाखल झाले आहेत. गत वर्षाच्या तुलनेत राज्यभरातील लाचखोरीत ७० गुन्हे वाढले आहेत. २०२३ मध्ये राज्यात ८०३ गुन्हे दाखल आहेत.(Bribe is highest in state in Nashik division nashik crime news)

२०२३ या वर्षभरात राज्यातील लाचखोरीच्या प्रमाणात घट होण्याऐवजी वाढ झाल्याचेच दिसून आले आहे. लाचलुचपत प्रतिबंधक विभागाच्या आठ विभागांमध्ये लाचखोरी कमी-अधिक प्रमाणात वाढलेली आहे. राज्यात लाचलुचपत प्रतिबंधक विभागाने ७८६ सापळे रचून १०९८ लाचखोरांना जेरबंद केले.

तर, १२ अपसंपदेच्या प्रकरणात २३ जणांविरोधात गुन्हे दाखल केले आहेत. अन्य भ्रष्टाचाराचे ५ गुन्हयात ४९ जणांविरोधात गुन्हे दाखल केले आहेत. असे राज्यात एकूण ८०३ गुन्ह्यात ११७० आरोपींविरोधात लाचखोरीचे गुन्हे दाखल करण्यात आले असून, ४ कोटी ५९ लाख ६८ हजार २५५ रुपयांच्या लाचेची रक्कम जप्त केली आहे.

प्रामुख्याने यामध्ये सर्वाधिक लाचखोरीचे गुन्हयांमध्ये राज्यात नाशिक विभाग अग्रस्थानी आहे. नाशिक विभागात नाशिकसह, जळगाव, धुळे, अहमदनगर आणि नंदूरबार या जिल्ह्यांचा समावेश होते. लाचलुचपत प्रतिबंधक विभागाच्या नाशिक विभागाने सहकार, भूमी अभिलेख, महसूल आणि शिक्षण विभागातील लाचखोरीत उच्चपदस्थ अधिकार्यांना लाचेची रक्कम स्वीकारताना रंगेहाथ अटकेची कारवाई केल्याने राज्यभरात गाजावाजा झाला आहे.

२०२३ या वर्षात सर्वाधिक १६० सापळे, एक अपसंपदेचा तर २ अन्य भ्रष्टाचारप्रकरणी असे एकूण १६३ गुन्हे दाखल करीत, २७४ लाचखोरांना जेरबंद केले आहे. गत २०२२ च्या तुलनेत २०२३ मध्ये ३७ लाचखोरीच्या गुन्ह्यांनी वाढ झालेली आहे. यामुळे नवीन वर्षातही ‘लाचलुचपत’च्या नाशिक विभागाचा हाच कित्ता सुरू राहतो की घट होते या येणार्या २०२४ या वर्षातच स्पष्ट होईल.

‘लाचलुचपत’ नाशिक विभाग :

सापळे - १६०

अपसंपदा - १

अन्य भ्रष्टाचार - २

एकूण गुन्हे - १६३

लाचखोरीची राज्याची आकडेवारी

परिक्षेत्र... गुन्हे.... संशयित

मुंबई - ४१ - ५६

ठाणे - १०३ - १४४

पुणे - १५० - २१२

नाशिक - १६३ - २७४

नागपूर - ७५ - ११६

अमरावती - ८६ - १२०

छत्रपती संभाजीनगर - १२५ - १६८

नांदेड - ६० - ८०

एकूण - ८०३ - १,१७०