बुलढाणा : समृद्धी महामार्गावर एका खासगी बसचा अपघात होऊन जवळपास २५ जणांचा मृत्यू झाल्याची धक्कादायक घटना घडली आहे. तर या अपघातातून ८ जणांचा जीव वाचला आहे. ही बस नागपूरहून पुण्याला जात होती त्यावेळी बुलढाणा जिल्ह्यातील सिंदखेड राजा येथील पिंपळखुटा येथे हा अपघात झाला.

(Buldhana Bus Accident Latest Update)

दरम्यान, एकूण ३३ प्रवाशांना घेऊन ही बस नागपूरहून येत असताना मध्यरात्री १ वाजून २० मिनीटांनी बस रस्त्याच्या मध्ये असलेल्या दुभाजकाला धडकली अन् पलटी होऊन तीने पेट घेतला. दरवाजाच्या बाजूने बस पलटी झाल्यामुळे प्रवाशांना बाहेर येता आलं नाही, त्यामुळे फक्त सात ते आठ जण बाहेर येऊ शकले. या घटनेचा थरार सांगताना प्रत्यक्षदर्शींना अक्षरश: रडू कोसळलं आहे.

"आमचे बंधू चक्की बंद करून जोरात पळू लागल्याने मी त्यांच्या मागे धावत गेलो, आम्ही काही लोकांना वर काढण्याचा प्रयत्न केला पण गाडीने पेट घेतल्यामुळे आम्हाला काहीच करता येत नव्हते. सुरूवातील थोडा थोडा जाळ सुरू होता पण त्यानंतर लगेच गाडीचा मोठा स्फोट झाला आणि गाडीचे काही पार्ट आजूबाजूला उडून पडले. "

"आतमध्ये असेलले लोकं मोठ्याने आरडाओरडा करत होते. कुणी काचेवर मोठ्याने मारत होते, त्यांना वाटत होतं खिडकीची काच फुटेल पण काच फुटली नाही. लोकं आतमधून वाचवा रे... वाचवा रे... म्हणत मोठ्याने हंबरडा फोडत होते. हे पाहून मलाही खूप रडायला आलं, असं दृश्य मी आयुष्यात पहिल्यांदा पाहिलं. घटनेनंतर १५ ते २० मिनीटांनी पोलिसांच्या गाड्या आल्या." अशी माहिती स्थानिक आणि प्रत्यक्षदर्शी अभिमन्यू दराडे यांनी दिली.

"खूप भयंकर परिस्थीत होती, आम्ही आमच्या डोळ्यांनी लोकांना जळताना पाहत होतो, पण तरीही आम्ही काही करू शकत नव्हतो. लहान बाळ जळालेलं पाहून आमच्या अंगावर शहारे आले. जे लोकं गाडीतून वाचले होते तेही गाडीच्या मागे आणि पुढे धावले. जो शेवटचा व्यक्ती बाहेर आला त्याने सांगितलं की, मी गाडीतून बाहेर पडलो त्यावेळी गाडीचा स्फोट झाला त्यामुळे बाकीच्या लोकांना बाहेर येता आलं नाही." असं प्रत्यक्षदर्शींनी सांगितलं.