मुंबई - मागील काही दिवसांपासून महाराष्ट्राच्या राजकारणात खातेवाटप आणि मंत्रीमंडळ विस्तार सर्वाधिक चर्चीला गेलेला विषय आहे. मात्र अजुनही याला मुहूर्त लागलेला नाही. त्यामुळे सरकारमध्ये अस्वस्थता असल्याचा आरोप विरोधकांकडून करण्यात येत आहे. अपक्ष आमदार बच्चू कडू यांनी तर थेट आपण मंत्रीपदाच्या शर्यतीत नसल्याचं स्पष्ट केलं. यावरून उद्धव ठाकरे गटाचे नेते आणि विधानपरिषदेचे विरोधीपक्षनेते अंबादास दानवे यांनी बच्चू कडूंना सूचक सवाल केला आहे.

बच्चू कडू म्हणाले होते, की आपण मंत्रीपदाच्या शर्यतीत नसून आपण त्याचा त्याग केला आहे. यावर अंबादास दानवे म्हणाले की, ते अर्थात शिंदे सरकार तुम्हाला मंत्रीपद देतच नाहीत, तर मग त्याग कशाचा करत आहात. तसेच ते काय मंत्रीपद घेऊन तुमच्या मागे फिरत आहेत का? ते त्यांच्याच लोकांना मंत्रीपद देऊ शकत नाहीत, मग तुम्हाला कुठून मंत्रीपद देणार, अशी टीकाही दानवे यांनी केली.

दररोज सांगण्यात येत, मंत्रीमंडळ विस्तार, आज होईल, उद्या होईल, परवा होईल. आधी, खातेवाटप व्हायला पाहिजे. पण आपल्याला वाटत नाही की, मंत्रीमंडळाचा विस्तार होईल, असंही दानवे यांनी नमूद केलं. तसेच एकनाथ शिंदे सोबतच्या लोकांना न्याय देऊ शकत नाही, तर अपक्ष आणि इतरांना न्याय देणे दुरापास्त असल्याचं दानवे यांनी नमूद केलं.

सध्याच्या मंत्रिमंडळ विस्ताराच्या धावपळीत अपक्ष आमदार बच्चू कडू यांनी मंत्रिपदाच्या शर्यतीतून माघार घेत आपण यासाठी आग्रही नसल्याचं स्पष्ट केलं आहे. पत्रकार परिषदेत त्यांनी आपली भूमिका मांडली, तसेच यावेळी मुख्यमंत्री एकनाथ शिंदे यांचे आभार मानत आपण त्यांचा गुलाम म्हणून काम करेन अशी अजब घोषणाही केली. यावेळी त्यांनी मंत्रीपदासाठी आपण उत्सूक नसल्याचं म्हटलं होतं.