Cabinet Meeting News: मराठवाडा मुक्तिसंग्रामाच्या अमृतमहोत्सवानिमित्त शनिवारी (ता. १६) मंत्रिमंडळाची स्मार्ट सिटी कार्यालयात बैठक होत आहे. त्यामुळे प्रशासनाने स्मार्ट कार्यालयाचा ताबा घेतला आहे.

सीईओंचे दालन मुख्यमंत्र्यांसाठी देण्यात आले असून, दोन उपमुख्यमंत्र्यांसाठी देखील स्वतंत्र दालनाची व्यवस्था करण्यात आली आहे. संपूर्ण स्मार्ट सिटी कार्यालयाला कार्पोरेट लूक देण्यात आला आहे. कार्यालयातील खुल्या जागेत पॉश सोफे लावण्यात आले आहेत. संपूर्ण कार्यालय वातानुकूलित करण्यात आले आहे.

मराठवाड्याच्या विकासाच्या अनुषंगाने यापूर्वीच्या मंत्रीमंडळाच्या बैठका विभागीय आयुक्त कार्यालयात घेतल्या जात होत्या, पण यावेळी स्मार्ट सिटी कार्यालयात ही बैठक होणार आहे. त्यानुसार गेल्या आठ दिवसांपासून जिल्हाधिकारी आस्तिककुमार पांडेय, महापालिकेचे प्रशासक तथा स्मार्ट सिटीचे सीईओ जी. श्रीकांत, जिल्हा परिषदेचे सीईओ विकास मीना हे नियोजन करत आहेत. दोन दिवसांपूर्वीच स्मार्ट सिटीच्या अधिकाऱ्यांना दालने रिकामे करण्याची सूचना करण्यात आली होती.

अधिकाऱ्यांच्या दालनांचा वापर मंत्री व अधिकाऱ्यांसाठी केला जाणार आहे तर मुख्यमंत्री व उपमुख्यमंत्र्यांसाठी सीईओ, उपमुख्यकार्यकारी अधिकाऱ्यांचे दालने वापरली जाणार आहेत. कार्यालयातील खुल्या जागेत एसीची व्यवस्था नसल्याने याठिकाणी एसी लावून सोफ्यांची व्यवस्था करण्यात आली आहे. मुख्य हॉलमध्ये मंत्रिमंडळ बैठकीचा मोठा फलक लावण्यात आला आहे.

दुभाजक फोडले

स्मार्ट सिटी कार्यालयाकडे येण्यासाठी कॅन्सर हॉस्पिटलसमोर दुभाजक फोडण्यात आले आहे. तसेच डॉ. बाबासाहेब आंबेडकर संशोधन केंद्राकडे जाणाऱ्या रस्त्याचे रुंदीकरण करून नव्याने डांबरीकरण करण्यात आले आहे. या भागात पोलिसांचा प्रचंड बंदोबस्त लावण्यात आला असून, जामा मशिदीपासून रस्ता बंद केला जाणार आहे.