शिवसेना खासदार संजय राऊत (Sanjay Raut) यांनी अग्रलेखातून भाजपाच्या चंद्रकांत पाटील यांच्यावर टीकास्त्र सोडले आहे. पंतप्रधान मोदी 22 तास काम करतात. उरलेले दोन तास झोपही पंतप्रधानांना येऊ नये यावर संशोधन सुरू आहे.' चमच्यांचे हे विधान ऐकून पंतप्रधान मोदींची (PM Modi) दोन तासांची झोपही उडाली असेल!, असा टोमणा राऊत यांनी लगावला आहे. आता त्यांच्या या वक्तव्यावर भाजपाकडून (BJP) प्रतिक्रिया येत आहेत. राऊत माझी वारंवार चेष्टा करतात, त्यांनी ही चेष्टा महागात पडणार आहे, असा इशारा चंद्रकांत पाटील (Chandrakant Patil) यांनी दिला आहे. सामना वाचणं बंद केलं, राऊतांवर बोलणं बंद केलं, असंही ते यावेळी म्हणाले आहेत.

राऊतांनी केलेल्या टीकेवर ते म्हणाले, मी सामना वाचणं आणि राऊतांवर बोलणं बंद केलं आहे. राऊतांना माझी चेष्टा करणं महागात पडणार आहे. महाविकास आघाडीचे महान नेते कोणतेही आरोप करुदेत काही फरक पडत नाही. कारण केंद्रीय तापस यंत्रणांची स्वायत्ता आहे. त्यांचे अधिकार ते वापरु शकतात. सत्ताधारी पक्षातील काहीजण जात्यात आहेत तर काहीजण सुपात, जात्यात गेलेल्यांच पीठ झालं आहे. काहीजण अजून जात्यात जाणार आहेत, असं सूचक विधानाही त्यांनी केलं आहे. यावेळी त्यांनी सांगलीतील आहिल्यादेवी होळकर यांच्या स्मारकाच्या लोकापर्ण सोहळ्यावरही भाष्य केलं. याशिवाय एसटीचा संप (ST Strike) संपवायचा असेल तर अजित पवार (Ajit Pawar) यांनी पुढाकार घेतला पाहिजे, असंही त्यांनी सांगितलं आहे.

अग्रलेखात काय म्हणाले आहेत राऊत

चंद्रकांत पाटील यांनी अंधभक्तीच्या चिपळ्या वाजवीत सांगितले, पंतप्रधान नरेंद्र मोदी हे अखंड काम करतात. ते बावीस तास काम करतात व फक्त दोन तास झोपतात. आता ही दोन तासही झोप येऊ नये म्हणून प्रयत्न सुरू आहेत. पाटलांची ही विधाने ऐकून दिल्लीत पंतप्रधान मोदींची दोन तासांची झोपही उडाली असेल. भक्तांना आणि चमच्यांना हे इतके मानसिक बळ येते कोठून, हाच संशोधनाचा विषय आहे. काँग्रेसच्या (Congress) काळात दिल्लीपासून सर्वत्र चमच्यांची चलती होती. मोदी युगात चमच्यांची जागा अंधभक्तांनी घेतली, पण काम तेच आहे, असा टोला त्यांनी लगावला आहे.