Chandrashekhar Bawankule News : शरद पवारांनी (Sharad Pawar) राष्ट्रवादीचे नेते जितेंद्र आव्हाड (Jitendra Awhad) यांचा राजीनामा घ्यावा. सध्या जितेंद्र आव्हाडांकून राजीनाम्याची नौटंकी सुरु आहे, असा घणाघात भाजपचे प्रदेशाध्यक्ष चंद्रशेखर बावनकुळे (Chandrashekhar Bawankule) यांनी केला आहे. ते माध्यमांशी संवाद साधताना बोलत होते.

चंद्रशेखर बावनकुळे पुढं म्हणाले, शरद पवारांनी जितेंद्र आव्हाडांचा राजीनामा त्वरित घ्यायला हवा. सरकार गेल्यामुळं अजितदादांची केविलवाणी वक्तव्य समोर येत आहेत. अजित पवार अस्वस्थेमध्ये बोलताना दिसत आहेत, अशी टीका त्यांनी अजितदादांवरही केली. सध्या राज्यात गुंडगिरीला थारा नाही. महाराष्ट्राचे गृहमंत्री अत्यंत संवेदनशील आहेत म्हणून अशांवर कारवाई होत आहे. एकनाथ शिंदे आणि देवेंद्र फडणवीस सरकारच्या कार्यकाळात अनेक विकासकाम होताना दिसत आहेत.

राष्ट्रवादीचे नेते आणि माजी मंत्री जितेंद्र आव्हाड यांच्याविरोधात विनयभंगाचा गुन्हा दाखल करण्यात आला आहे. याचा निषेध करत जितेंद्र आव्हाड यांनी या विरोधात आंदोलन करताना आपण आमदारकीचा राजीनामा देणार असल्याचं म्हटलंय. यावर बावनकुळे म्हणाले, तो व्हिडिओ पाहा, राष्ट्रवादी काँग्रेस पक्षात नैतिकता असेल तर राष्ट्रवादी काँग्रेसनं जितेंद्र आव्हाड यांचं निलंबन करायला हवं. तसंच, अशा घटना होत राहतात असं बोलणाऱ्या विरोधातही गुन्हा दाखल करावा, अशी मागणीही बावनकुळेंनी केलीय.

राज्यात आता तातडीनं कारवाई होते. अडीच वर्षाच्या काळात मविआचे सीएम, डीसीएम कमजोर होते. मविआ सरकारच्या काळात गुन्हेगारांचं समर्थन केलं गेलं, असंही त्यांनी स्पष्ट केलं.