मुंबई - राज्य परिवहन विभागात ऑनलाइन पद्धतीने होणाऱ्या १६६ मोटार वाहन निरिक्षक तर ३२५ सहाय्यकांच्या बदली पात्र यादीचा घोळ कायम आहे. राज्यभरातील अधिकाऱ्यांनी यावर आपल्या हरकती नोंदवल्या असून, त्यावर परिवहन आयुक्त कार्यालयाने दखलच घेतली नसल्याने अखेर अधिकाऱ्यांनी मॅट मध्ये धाव घेतली आहे. त्यामूळे खुद्द मुख्यमंत्र्यांकडेच असलेल्या या परिवहन विभागाचा कारभार संपता संपत नसल्याचे दिसते आहे.

बदली पात्र असलेल्या मोटार वाहन निरीक्षकानी एकमेकांच्या बदली पात्र क्रमांकावर आक्षेप नोंदवले आहे. महाराष्ट्र लोकसेवा आयोगाची उत्तीर्ण उमेदवारांची य़ादी घोषीत झाल्यानंतर प्रत्यक्षात विभागात रुजू होण्यासाठी प्रत्येकाला वेगवेगळा कालावधी लागला आहे. त्यामूळे विभागीय नियुक्तीच्या घेण्यात आलेल्या नोंदी चुकीच्या आहे.

त्यामूळे महाराष्ट्र नागरी सेवा अधिनियमांतर्गत जेष्ठता यादीत मानीव रुजू दिनांक एकाच परिक्षेत उत्तीर्ण होऊन सर्वात आधी रुजू झालेल्या उमेदवारांचा रुजू दिनांक ग्राह्य धरण्याची मागणी अधिकार्यांनी केली आहे. शिवाय मॅट ने बदली पात्र यादीमधील आदिवासी भागांत कर्तव्य बजावणार्या अधिकाराच्या नावांपुढे तशा प्रकारची नोंद घेवून यादी नव्याने प्रसारीत करण्याचे आदेश केले असून, त्यानंतरच बदली आदेश काढण्याचे मॅट ने आदेश परिवहन विभागाला दिले आहे.

गेल्या अनेक वर्षांपासून बढती-बदली पात्र सेवा जेष्ठता यादीचा घोळ परिवहन विभागात कायम आहे. मात्र, अद्याप त्यावर कोणताही असा ठोस तोडगा काढू न शकल्याने अद्यापही परिवहन अधिकाऱ्यांमध्ये संताप व्यक्त केला जात आहे. शिवाय अधिकाऱ्यांचे बदली पात्र यादीतील अनुक्रमांक परिवहन आयुक्त कार्यालयातूनच बदलवण्यात आल्याचा आरोप अधिकाऱ्यांकडून सकाळ शी बोलतांना नाव न लिहीण्याच्या अटिवर केला आहे.