मुंबईः राज्याचे मुख्यमंत्री एकनाथ शिंदे हे दुपारी दिल्लीकडे रवाना झाले होते. आता सायंकाळी उपमुख्यमंत्री देवेंद्र फडणवीस हे दिल्लीला गेले आहेत.

राज्यामध्ये सरकार स्थापन झाल्यानंतर रखडलेला मंत्रिमंडळ विस्तार कधी होतो, याकडे सर्वांचं लक्ष लागून राहिलं आहे. शिंदे गटातीलल काही नेते जाहीरपणे नाराजी बोलून दाखवतात. मात्र सरकार विस्तार करण्यास चालढकल करत असल्याचं दिसून आलं.

सुप्रीम कोर्टाच्या निकालानंतर मंत्रिमंडळ विस्तार होईल, असं सांगितलं जात होतं. मात्र कोर्टाचा निकाल येऊन एक महिना उलटला आहे. तरीही अद्याप मंत्रिमंडळ विस्तार झाला नाही. आज मात्र राज्याचे मुख्यमंत्री आणि उपमुख्यमंत्री दिल्लीला रवाना झाले आहेत.

दिल्लीमध्ये दोन्ही नेते केंद्रीय गृहमंत्री अमित शाह यांची भेट घेणार असल्याची माहिती आहे. या बैठकीमध्ये रखडलेल्या मंत्रिमंडळ विस्तारावर चर्चा होण्याची शक्यता वर्तवण्यात येत आहे. तसेच राज्यातील औद्योगिक प्रकल्पांसंदर्भात या भेटीत चर्चा होईल, असंही मीडिया रिपोर्टनुसार सांगण्यात येतंय.

मुख्यमंत्री एकनाथ शिंदे आज दुपारी मुंबईहून दिल्लीला रवाना झाले. त्यानंतर सायंकाळी उपमुख्यमंत्री देवेंद्र फडणवीस हे नागपूरहून दिल्लीला रवाना झाले. राज्यातील मंत्रिमंडळ विस्तार लवकरच मोठी अपडेट येईल, अशी अपेक्षा व्यक्त होत आहे.