महाराष्ट्र नवनिर्माण सेनेचे अध्यक्ष राज ठाकरे यांनी काल एका वृत्तवाहिनीला दिलेल्या मुलाखतीत उद्धव ठाकरेंवर जोरदार निशाणा साधला आहे. शिवसेनेतल्या बंडाला त्यांनी उद्धव ठाकरेंना जबाबदार धरलंय. तर उद्धव ठाकरे विश्वास ठेवण्यासारखे नाहीत, असंही ते म्हणालेत. यावरुनच शिवसेना नेत्या दीपाली सय्यद यांनी राज ठाकरेंना टोला लगावला आहे. (Deepali Sayyad on Raj Thackeray)

आपल्या ट्वीटमधून दीपाली सय्यद (Deepali Sayyad) यांनी राज ठाकरेंना टोला लगावला आहे. त्या म्हणाल्या, "माननीय लोक आधी बोलतात मोदीजींबद्दल, नंतर करतात पवार साहेबांच्या मनासारखे ,वेळ येईल तशी पलटी मारतात, हे संपूर्ण अयोध्यालाच नाही तर देशाला माहीत आहे. माननीय राजसाहेबांनी आजारी असल्याने आराम करावा. आदरणीय उद्धव साहेब लवकरच तुम्हाला भेटायला येतील, सतत आठवण काढू नये".

शिवसेना मनसेच्या युतीबद्दल एका मुलाखतीत काल राज ठाकरेंना प्रश्न विचारण्यात आला. त्यावर उद्धव ठाकरे विश्वासार्ह नसल्याचं मत राज ठाकरेंनी व्यक्त केलं. उद्धव ठाकरे बोलतात वेगळं आणि करतात वेगळं. त्यांच्यावर विश्वास ठेवण्यासारखं काहीच नाही. बाकीच्या माणसांसाठी मला वाईट वाटतं, पण हा माणूस विश्वास ठेवण्यासारखा नाही, असं राज ठाकरे म्हणाले होते. तसंच अख्ख्या देशाला आणि राज्याला माहित नाही, इतका जवळून मला उद्धव ठाकरे काय आहे हे माहित आहे, असंही विधान त्यांनी केलं होतं.