राज्याचे विधान परिषदेचे विरोधी पक्षनेते प्रवीण दरेकर यांच्यावर दाखल झालेल्या गुन्ह्यावरून देवेंद्र फडणवीस यांनी सरकारवर हल्लाबोल केला. यावेळी दरेकरांचा बचाव करताना फडणवीसांनी राष्ट्रवादीच्या नेत्याकडे बोट दाखवलं. फडवणीस म्हणाले की, मी कालच सांगितले होते, सरकार आता प्रविण दरेकर यांच्यावर गुन्हा दाखल करण्याचा कट रचत आहे. दरेकर मजूर संस्थेचे अध्यक्ष होते, म्हणून त्यांच्यावर गुन्हा दाखल झाला. पण राज्यातील कोणतीही मजूर संस्था काढा, अर्धे आमदार आहेत आणि त्यात सगळ्याच पक्षांचे आहेत. सगळ्या पक्षांचे आमदार मजूर संस्थेचे अध्यक्ष आहेत. आपण कोणत्याही बँकेत मजूर संस्थेतून निवडून आलेल्यांची यादी बघा ते कोणत्या तरी पक्षाचे नेते आहेत. मागील वेळी आम्ही ही गोष्ट बोललो तेव्हा हे खुद्द अजित पवारांनीसुद्धा मान्य केले होते.

सुडाच्या भावनेने विरोधी पक्षाचा आवाज दाबण्यासाठी दरेकर यांच्याविरुद्ध गुन्हा दाखल केला. मात्र, आम्ही घाबरणार नाही. आम्ही न्यायालयात जावू, आमचा आवाज बुलंद राहिल. विरोधी पक्षनेत्यावर अशा प्रकारची कारवाई, आधी असं कधीच घडलं नव्हतं. याशिवाय आजपासून आम्ही सरकारला प्रत्येक ठिकाणी मजूर संस्थांचे अध्यक्ष कोण आहेत. त्याची यादी देऊ. कोणावर गुन्हा दाखल करणार, हे पाहू. जर तसे झाले नाही तर सरकारविरोधात न्यायालयात जाऊ. सरकारने याबाबत आम्हाला माहिती द्यावी, तो आमचा अधिकार असल्याचं फडणवीस म्हणाले.

फडणवीस यांनी गुलाबराव देवकर यांचा उल्लेख करत दरेकरांच्या बचावाचा प्रयत्न केला. फडणवीस म्हणाले की,"गुलाबराव देवकर हे आजही मजूर संस्थेचे अध्यक्ष आहेत. ते राष्ट्रवादीचे नेते आहेत." दरम्यान या प्रकरणी संसदीय कामकाज मंत्री अनिल परब यांनी गृहमंत्री उत्तर देतील असं सांगितलं.

मुंबई बँकेच्या प्रकरणात पोलिसांना लक्षात आलं की सत्तापक्षाचे लोक यामध्ये सामिल आहेत. पोलिसांनी हा गुन्हा दाखल केला. प्रविण दरेकर त्या बँकेत निवडून आले आहेत. मजूर संघटनेचे अध्यक्ष झाले. गुलाबराव देवकरही त्याचे सभासद आहेत. विरोधी पक्ष बोलतात म्हणून त्यांच्यावर कारवाई करण्यात आली. नवीन पोलीस कमिशनर सत्तेत आल्यानंतर भाजपच्या नेत्यांवर गुन्हे दाखल होणार हे स्पष्ट आहे. आम्ही कोर्टात जाऊ असं सांगताना फडणवीस म्हणाले की, खड्डा खोदतो, तोच खड्ड्यात जातो.