मुंबई : मराठवाडा मुक्तिसंग्राम दिनाच्या निमित्ताने मुख्यमंत्री उद्धव ठाकरे (cm uddhav thackeray) आज मराठवाड्यामध्ये (Marathwada) आहेत. एका कार्यक्रमात आज उद्धव ठाकरे आणि केंद्रीय मंत्री रावसाहेब दानवे (Raosaheb danwe) एकत्र आले. यावेळी मुख्यमंत्र्यांनी भाषणाची सुरुवात करताना 'आजी, माजी आणि एकत्र आलो तर भावी सहकारी' असं विधान केलं. त्यावरुन आता मोठ्या प्रमाणात राजकीय तर्क-वितर्क लढवण्यास सुरुवात झाली आहे. शिवसेना-भाजपा (shivsena-bjp) पुन्हा एकत्र येणार? ही चर्चा सुरु झाली आहे. त्यावरच आता विरोधी पक्षनेते देवेंद्र फडणवीस (Devendra Fadnavis) यांनी पहिली प्रतिक्रिया दिली आहे.

राजकारणात कधीही काही होऊ शकतं. त्यांना माझ्या शुभेच्छा आहेत. हे तिन्ही पक्षांचं अनैसर्गिक गठबंधन चालू आहे. ते फार काही टीकू शकणार नाही. महाराष्ट्राचं नुकसान होतंय. म्हणून त्यांनी मनातील भावना बोलून दाखविली. पण दोघांची युती होईल ते आज मला दिसत नाही. सरकार बनविण्यासाठी भाजपची मानसिकता नाही. भाजप सक्षम विरोधी पक्ष म्हणून काम करत आहेत. लोकांच्या मनातील आशा घेऊन सरकारविरोधात आंदोलन करत आहोत. माननीय मुख्यमंत्र्यांच्या लक्षात आलं की ते कशाप्रकारच्या लोकांसोबत काम करतोय. हे त्यांना समजलं, असे फडणवीस म्हणाले.

...तर आंदोलन करू

काँग्रेस, राष्ट्रवादीची भूमिका पूर्णपणे दुट्टपी आहे. एक भाव देशात आणण्यासाठी जीएसटीचा निर्णय सरकारने केला. आज काँग्रेस त्याला विरोध केला. त्यांचा खरा चेहरा उघड झाला आहे. पेट्रोल, डिझेल जीएसटीमध्ये आणण्यासाठी त्यांनी विरोध केला तर आम्ही काँग्रेसच्या विरोधात आंदोलन करू, असा इशाराही त्यांनी दिला.

दरम्यान, चंद्रकांत पाटील यांनी 'माजी मंत्री म्हणू नका', असं सूचक वक्तव्य केलं होतं. त्यानंतर उद्धव ठाकरे यांनी 'आजी, माजी आणि एकत्र आलो तर भावी सहकारी' असं विधान केलं. त्यानंतर आता राजकीय वर्तुळात चर्चांना उधाण आले.