मुंबई : मुख्यमंत्री देवेंद्र फडणवीस यांनी आज, राज्यपाल  भगतसिंग कोश्यारी यांच्याकडे पदाचा राजीनामा सुपूर्द केला. त्याचवेळी राज्यपालांनी त्यांना काळजीवाहून मुख्यमंत्री म्हणून कार्यभार सांभाळण्याचे आवाहन केले आहे. त्याला आवाहनाला फडणवीस यांनी होकार दिल्याने ते राज्याचे काळजावाहू मुख्यमंत्री राहणार आहेत. त्याचवेळी महायुतीमधील प्रमुख मित्र पक्ष असलेल्या शिवसेनेसोबत झालेल्या मतभेदांवरही फडणवीस यांनी पत्रकार परिषद घेऊन भूमिका स्पष्ट केली. मतभेद टोकाला गेल्यानंतरही शिवसेना-भाजप युती तुटलेली नाही. शिवसेनेसोबत चर्चेच दरवाजे खुले आहेत, असे फडणवीस यांनी या वेळी स्पष्ट केले. 

राजीनामा दिल्यानंतरही फडणवीसच मुख्यमंत्री

मुख्यमंत्री फडणवीस यांनी पत्रकार परिषदेत शिवसेना पक्षप्रमुख उद्धव ठाकरे यांच्या एका वक्तव्यावर थेट नाराजी व्यक्त केली. उद्धव ठाकरे यांनी 'आमच्यासोबत सर्व पर्याय खुले आहेत', असे वक्तव्य केल्याचा उल्लेख फडणवीस यांनी करून नाराजी व्यक्त केली. फडणवीस यांनी निवडणूक निकालानंतरच्या पत्रकार परिषदेनंतर पहिल्यांदाच एवढी मोठी पत्रकारपरिषद घेऊन खुलेपणाने भूमिका मांडली. राज्याच्या जनतेने महायुतीला कौल दिला होता. पहिल्या पत्रकार परिषदेतच मी महायुतीचं सरकार येईल, असं स्पष्ट केलं होतं, असं सांगून फडणवीस यांनी उद्धव ठाकरेंबद्दल नाराजी व्यक्त केली.'

अडीच वर्षाच्या निर्णयावर देवेंद्र फडणवीस यांचे स्पष्टीकरण (व्हिडिओ)

'फोडाफोडीचं राजकारण करणार नाही'
आज, सकाळपासून भाजपवर फोडाफोडीच्या राजकारणाचा आरोप होत आहे. त्यावर फडणवीस म्हणाले, 'आम्ही कोणत्याही प्रकारचे फोडाफोडीचे राजकारण करत नाही. ती आमची संस्कृती नाही. सरकार स्थापन करतानाही आम्ही अशा प्रकारे कोणतिही जुळवाजुळव करणार नाही. जर, कोणाला आमिष दिल्याचा, पैसे दिल्याचा आरोप आमच्यावर कोणी करत असेल तर त्यांनी त्याचे पुरावे द्यावेत.'