हिजाब प्रकरणाने (Hijab Case) संपूर्ण राज्य ढवळून निघाले असून आता याचे पडसाद देशभरात सगळीकडे उमटू लागले आहेत. या प्रकरणी कर्नाटक उच्च न्यायालयाने मंगळवारी राज्यातील वाढत्या वादाच्या पार्श्वभूमीवर विद्यार्थी आणि सामान्य लोकांना शांतता आणि सलोखा राखण्याचे आवाहन केले. दरम्यान कर्नाटकात हिजाब प्रकरणावरून सुरू असलेला गदारोळ दुर्दैवी असल्याचे मत गृहमंत्री दिलीप वळसे पाटील (Dilip Walse Patil) यांनी व्यक्त केले आहे. त्यांनी यासंबंधी ट्विट केले आहे.

दरम्यान आज मुंबईत कर्नाटकात सुरु असलेल्या हिजाब प्रकारणात, मुलींच्या हिजाबच्या हक्कासाठी मुस्लीम महिलांनी स्वाक्षरी मोहिमेत फलक घेऊन सहभाग घेतला. तर कर्नाटकचे मुख्यमंत्री बसवराज बोम्मई यांनी या वादासंबंधी ट्विट करत सर्व विद्यार्थ्यी, शिक्षक आणि शाळा महाविद्यालयांच्या व्यवस्थापणन तसेच कर्नाटकातील लोकांना शांतता आणि सलेखा राखण्याचे आवाहन केले आहे. सोबतच त्यांनी पुढील तीन दिवस सर्व माध्यमिक शाळा आणि महाविद्यावये बंद ठेवण्याचे आदेश दिले आहेत

वळसे पाटील यांनी त्यांच्या ट्विटमध्ये म्हटले आहे की, कर्नाटकात हिजाब प्रकरणावरून सुरू असलेला गदारोळ दुर्दैवी आहे. शैक्षणिक क्षेत्रात अशाप्रकारचे वाद निर्माणच व्हायला नकोत.

वळसे पाटील पुढे म्हणाले की, 'कर्नाटक हायकोर्टात याबाबत सुनावणी सुरू आहे. माझी महाराष्ट्रासह इतर सर्व राज्यांतील जनतेला विनंती आहे की, या विषयाला फार महत्त्व देऊ नये. तसेच धार्मिक कटुता निर्माण होईल, असे वक्तव्य किंवा कृती कुणीही करू नये.'