राष्ट्रवादी काँग्रेसचे नेते अजित पवार यांच्यासह ९ नेत्यांनी शिवसेना, भाजप सरकारला पाठिंबा दिला. त्यानंतर राष्ट्रवादी पक्षात फूट पडली. पक्षात दोन गट निर्माण झाले. यानंतर पक्षातील काही अनेक नेत्यांनी पदाधिकाऱ्यांनी, कार्यकर्त्यांनी अजित पवार यांना पाठिंबा दिला. तर राज्याच्या कानाकोपऱ्यातून जेष्ठ मंडळींपासून अनेकांनी शरद पवारांना आम्ही तुमच्या सोबत असल्याचं सांगितलं आहे. तर काही जवळच्या नेत्यांनी देखील आधी सोबत येऊन नंतर शरद पवारांची साथ सोडली.

दरम्यान राष्ट्रवादीचे नेते (शरद पवार गट) आणि खासदार अमोल कोल्हे यांचा एक व्हिडीओ सोशल मिडीयावर व्हायरल होत आहे. अमोल कोल्हे यांचा साताऱ्यातील एका भाषणाचा हा व्हिडीओ आहे. साताऱ्यात एका कार्यक्रमादरम्यान एका चिमुकल्याने अमोल कोल्हेंना भावनिक साद घातली आहे. 'शरद पवार साहेबांना तेवढं सोडू नका' असं या मुलानं यावेळी म्हंटलं आहे.

साताऱ्यातील भाषणामध्ये बोलताना अमोल कोल्हे म्हणाले की, 'मला एका चिमुकल्याचं कौतूक वाटलं, एक चिमुकला पटकन म्हणाला मला बोलायचं आहे. तो आला आणि त्याने माझ्या कानात एक गोष्ट सांगितलं.'

'मला एका गोष्टीचं अप्रुप वाटलं की, माझ्या आजच्या पिढीमध्ये धिटाई आहे. ते खासदाराला सांगू शकतात, मला काहीतरी सांगायचं आहे.'

पण, त्यापेक्षा महत्त्वाची गोष्ट ही होती. त्याने जे सांगितलं, त्याच्यावरून त्याच्या घरातील राजकीय सजगता दिसून येते. त्यांनी जवळ येऊन हळूच कानात सांगितलं 'तेवढं पवार साहेबांना सोडू नका'.

पुढे कोल्हे म्हणाले, 'हा माझ्यासाठी शॉक होता. इतकं लहान पोरगं जर माझ्या कानात सांगत असेल की, मला तुमच्याशी बोलायचंय आणि त्यांनी मला सांगितलं 'तेवढं पवार साहेबांना सोडू नका', आणि त्यावेळी हा राजकीय मंच नाही पण, खात्री पटते की, समाजात जे काही होतं. ते घडत असताना त्यातून ज्या जाणिवा प्रगल्भ केल्या गेल्या. तर, ज्यांच्या खांद्यावर उद्याचं भवितव्य आहे, ज्यांच्या खांद्यावर उद्याचं राज्य आहे, ज्यांच्या खांद्यावर उद्याचा देश आहे. त्यांच्या मनातील राजकीय भावना इतक्या प्रगल्भ होऊ शकतात. याची मला पोहोचपावती मिळाली, असं कोल्हे पुढे म्हणाले आहेत.