पुणे : शहरातील वाढत्या कोरोना संसर्गाच्या पार्श्‍वभूमीवर नागरिकांना महत्वाच्या कारणांसाठी आंतरजिल्हा किंवा परराज्यात प्रवास करण्यासाठी पोलिस महासंचालक कार्यालयातर्फे ई-पास मिळविण्याची सुविधा उपलब्ध करून देण्यात आली आहे. याबरोबरच नागरिकांना स्थानिक पोलिस ठाण्यातूनही पास उपलब्ध होणार असल्याचे संबंधित विभागाने स्पष्ट केले आहे. मात्र नागरिकांना हे ई-पास केवळ आपत्कालीन परिस्थितीसाठीच मिळू शकणार आहेत. ज्या नागरिकांना ई-पासची आवश्‍यकता आहे, अशा नागरिकांना ई-पाससाठी covid19.mhpolice.in या लिंकवर अर्ज करावा लागणार आहे.

अशी आहेत ई-पास मिळविण्यासाठीची प्रक्रिया

• - अत्यावश्‍यक सेवा पुरविणाऱ्यांना प्रवासासाठी आंतरजिल्हा किंवा आंतरराज्य प्रवासासाठी प्रवास पासची गरज नाही

• - पास मंजूर करणे किंवा नाकारण्याचा अधिकार पोलिस अधिक्षक किंवा शहरातील पोलिस उपायुक्तांना असणार आहे.

• - अन्य सर्व वैयक्तीक व समुहांना या पद्धतीनुसार पास उपलब्ध होऊ शकतील.

• - अर्जामध्ये नमूद केलेल्या सर्व बाबी व्यवस्थित भरुन द्या

• - अर्जासोबत जोडण्यासाठीची कागदपत्रे लिंकवर अपलोड करताना एकाच फाईलमध्ये एकत्र करा.

• - अर्जासोबत जोडण्यासाठीच्या फोटोचा आकार हा 200 केबी व कागदपत्रांचा आकार हा 1 एमबी पेक्षा जास्त असू नये.

• - संबंधित विभागाकडून पडताळणी व मान्यता मिळाल्यानंतर तुम्ही टोकन आयडी वापरुन ई-पास डाउनलोड करू शकता

• - संबंधीत विभागाकडून तुमचा अर्ज मंजुर झाल्यानंतर टोकन क्रमांक टाकून तुमचा ई-पास प्राप्त करून घ्या

• - ई-पासमध्ये आपले तपशील, वाहन क्रमांक, वैधता आणि एक क्‍यूआर कोड असेल.

• - संबंधीत ई-पासची एक प्रत तुमच्याजवळ ठेवा, त्याचबरोबर मोबाईलमध्येही त्याची "सॉफ्ट कॉपी' असू द्या. पोलिसांकडून विचारणा झाल्यानंतर पास दाखवा

• - ई-पासचा गैरवापर करणे, मुदत संपल्यानंतरही वापर करणे किंवा विनापरवानगी पास वापरणे हा कायदेशीर गुन्हा ठरतो, त्यासाठी शिक्षेची तरतूद आहे.

ई-पाससाठीची आपत्कालीन कारणे

• - अत्यावश्‍यक सेवा

• - स्थानिक स्वराज्य संस्थांच्या सार्वजनिक सेवा पुरविणाऱ्या व्यक्ती

• - मृत्यु झालेल्या व्यक्तीचे प्रथम नातेवाईक

• - तत्काळ वैद्यकीय उपचार

• - लग्न

• - अन्य

पोलिस महासंचालक कार्यालयाने ई-पाससाठी covid19.mhpolice.in ही लिंक उपलब्ध करून दिली आहे. पुणे शहरातील नागरिकांनाही आपत्कालीन कारणासाठी आंतरजिल्हा किंवा परराज्यातील प्रवासासाठी लागणारे ई-पास संबंधीत लिंकवर उपलब्ध होतील.''

- अमिताभ गुप्ता, पोलिस आयुक्त.