Earthquake in maharashtra : बुधवारी ता.१० सकाळी ७ वाजून १५ मिनिटांनी वसमत तालुक्यात भुगर्भातून मोठा आवाज आल्यानंतर भुकंपाचा धक्का जाणवला. जमीन हादरल्याने नागरीक भयभीत होऊन घराबाहेर पडले. या भुकंपाचा केंद्रबिंदू कळमनुरी तालुक्यात असून यांची नोंद ४.० रिस्टर स्केल असल्याची माहिती तहसिलदार शारदा दळवी यांनी दिली.

वसमत तालुक्यात खास करुन पांगरा शिंदे परिसरात नेहमीच जमीनीतूनगुढ आवाज येऊन भुकंपाचे सौम्य धक्के जाणवतात. मात्र याबाबत प्रशासनाकडून कोणतीच ठोस उपाययोजना करण्यात आली नाही. यानंतर अनेक वेळा पुर्ण हिंगोली जिल्ह्याला भुकंपाचे धक्के लागल्याच्या घटना घडल्या आहेत.

बुधवारी सकाळी ७ वाजून १५ मिनिटांनी अचानक भुगर्भातून मोठा आवाज झाला. त्याऩतर काही सेकंद जमीन अक्षरशः हादरली. अचानक आलेला आवाज आणि जमिन हादरल्याने नागरीक भयभीत होऊन घराबाहेर पडले.

पुन्हा भुकंपाचा धक्का लागू शकतो म्हणून तासभर नागरीक घराबाहेर राहिले. दरम्यान याबाबत तहसिलदार शारदा दळवी यांना विचारले असता सदरील भुकंपाचा केंद्रबिंदू कळमनुरी तालुक्यात असून वसमत तालुक्याला त्याचे सौम्य धक्के बसले असून रिस्टर स्केल मध्ये भुकंपाची नोंद ४.० एवढी असल्याचे म्हणाले. भुकंपामुळे तालुक्यात जिवित किंवा वित्त हाणी झाली नसल्याची प्रथमदर्शी माहिती असल्याचे सांगितले.