मुंबई - मुख्यमंत्री एकनाथ शिंदे यांचे पूत्र डॉ.श्रीकांत शिंदे खासदार असलेल्या कल्याण लोकसभा मतदारसंघांबाबतचा वाद जवळपास संपला असून शिवसेनेच्या शिंदे गटातर्फे या ठिकाणी निवडणूक लढवली जाईल असे समजते. या जागेवरून ठाणे-कल्याण परिसरातील भाजप आणि शिवसेनेचे कार्यकर्ते परस्परांशी वाद घालत होते.

दरम्यान दोन्ही पक्षातील कार्यकर्त्यांमधील कटुता अयोग्य असल्याने टाळायला हवी. परस्परांविरोधातील हे वातावरण योग्य नसल्याचे लक्षात घेता महत्त्वपूर्ण निर्णय घेण्यातआला. त्यानुसार, आता कल्याण लोकसभा मतदारसंघाची लोकसभेची जागा शिवसेनेच्या शिंदे गटाने लढवावी अन्‌ ठाणे भाजपला द्यावी, असा प्रस्ताव मान्य होण्याची शक्‍यता आहे.

मुख्यमंंत्री एकनाथ शिंदे यांचे चिरंजीव कल्याणमधून खासदार आहेत. तरी देखील भाजपकडून बॅरनबाजी करत, कल्याणच्या जागेवर दावा करण्यात येत होता. मात्र आता यावर तोडगा निघाला असल्याचं सांगण्यात येत आहे. त्यामुळे सहाजिकच भाजप आणि शिवसेनेतील संभाव्य संघर्ष टळणार आहे.