Param Bir Singh: राज्यात महाविकास आघाडीचे सरकार असताना तत्कालिन विरोधी पक्षनेते देवेंद्र फडणवीस यांच्यासह तत्कालिन नगरविकास मंत्री एकनाथ शिंदे यांनाही अटक करण्यासाठी माझ्यावर माजी गृहमंत्री अनिल देशमुख यांनी दबाव आणला होता.

असा खळबळजनक आरोप करत मुंबईचे माजी पोलिस आयुक्त परमबीर सिंग यांनी आज केल्याने खळबळ निर्माण झाली आहे. आपण मात्र कुणावरही खोटा गुन्हा दाखल करणार नाही असे देशमुख यांना सुनावल्याचा दावाही त्यांनी केला आहे.

परमबीर सिंग यांनी ‘एएनआय’ वृत्तसंस्थेशी बोलताना आज पुन्हा एकदा ‘मविआ’च्या नेत्यांवर आरोपांच्या फैरी झाडल्या. ‘‘तत्कालिन विरोधी पक्षनेते देवेंद्र फडणवीस यांच्यासह भाजपाच्या इतर काही नेत्यांना अटक करण्यासाठीसुद्धा अनिल देशमुख यांनी दबाव आणला होता.

यासंदर्भात शरद पवार यांच्या ‘सिल्व्हर ओक’ आणि उद्धव ठाकरे यांच्या ‘मातोश्री’ या निवास्थानी बैठक झाली होती,’’ असे ते म्हणाले. ‘‘ या बैठकीला शरद पवार, अनिल देशमुख, अनिल गोटे उपस्थित होते.

या बैठकीत त्यांनी माझ्यावर विरोधकांवर खोटी कारवाई करण्यासंदर्भात दबाव आणला. मात्र, मी त्यांना नकार दिला. मी अशाप्रकारे कुणावरही खोटा गुन्हा दाखल करणार नाही असे स्पष्टपणे सांगितले,’’ असेही परमबीर यांनी नमूद केले.