मुंबई: अंडरवर्ल्ड डॉन छोटा राजन (Underworld Don Chhota Rajan) आणि रवी पुजारीचा (Ravi Pujari) जवळचा सहकारी सुरेश पुजारीला (Suresh Pujari) फिलीपाईन्समधून भारतामध्ये आणण्यात आलं आहे. दिल्ली पोलिसांच्या एका वरिष्ठ अधिकाऱ्याने बुधवारी सांगितलंय की, मुंबई आणि कर्नाटकामध्ये खंडणीद्वारे वसुली करण्याची अनेक प्रकरणे पुजारीच्या नावावर आहेत. गँगस्टर सुरेश पुजारीच्या नावावर मुंबईव्यतिरिक्त ठाणे, कल्याण, उल्हासनगर आणि डोंबिवलीमध्येही याप्रकारचे गुन्हे दाखल असून त्याला फिलीपाईन्समधून (Philippines) अटक करण्यात आली आहे. त्याला मंगळवारी रात्री उशीरा भारतात आणलं गेलंय.

मुंबईतील अंडरवर्ल्डमधील आणखी एक नाव सुरेश पुजारी उर्फ ​​सतीश पै आता भारतात आहे. काही दिवसांपूर्वी, यूएस फेडरल ब्युरो ऑफ इन्व्हेस्टिगेशन आणि न्यायाधिकार विभागाच्या संयुक्त कारवाईत त्याला फिलीपिन्समधून अटक करण्यात आली होती. गेल्या वेळी प्रकृती अस्वास्थ्यामुळे पुजारीला भारतात आणण्यात भारतीय एजन्सीला यश आले नव्हते. यावेळी त्याला भारतात आणण्यात भारतीय एजन्सीला यश आले आहे. सुरेश पुजारी सध्या दिल्लीत आहेत, त्याला थेट दिल्लीत आणण्यात आलं आहे.

सुरेश पुजारी यांच्यावर मुंबईत २५ हून अधिक गंभीर गुन्हे दाखल आहेत. कुख्यात गुंड सुरेश पुजारीला फिलिपिन्स मध्ये अटक झाली होती. मुंबईत सुरेश पुजारीवर ४० गुन्ह्यांची नोंद असून त्यातील १६ गुन्हे हे खंडणीचे आहेत. दिग्दर्शक महेश भट यांच्या कार्यालयाबाहेर गोळीबार करण्यामागेही पुजारीचा हात आहे.

याबाबत आता राज्याचे गृहमंत्री दिलीप वळसे पाटील यांनी प्रतिक्रिया देताना म्हटलंय की, पोलिसांनी काल संध्याकाळी कुख्यात गुन्हेगार सुरेश पुजारीला दिल्लीतून अटक केलीय. आज त्याला कोर्टासमोर हजर केले जाईल. त्याची टोळी धमकीद्वारे खंडणी मागायची. आता त्याच्यावरील कारवाईमुळे गुन्ह्याचं प्रमाण कमी होईल, असं त्यांनी म्हटलंय.