डोंबिवली : भाजप आमदार गणपत गायकवाड गोळीबार प्रकरणात गुन्हे शाखेने गायकवाड यांचा खासगी चालक रणजीत यादव याला शनिवारी अटक केली आहे. रविवारी उल्हासनगर कोर्टात रणजीत याला हजर केले असता न्यायालयाने त्याला 14 फेब्रुवारी पर्यत पोलीस कोठडी सुनावली आहे. या प्रकरणात काही दिवसांपूर्वी गायकवाड यांचा निकटवर्ती विकी गणात्रा याला पोलिसांनी अटक केली आहे. आमदार गायकवाड यांचा मुलगा वैभव हा अद्याप फरार असून पोलीस त्याचा शोध घेत आहेत. (Ganpat Gaikwad Firing Case Latest Update)

जमिनीच्या वादातून भाजप आमदार गणपत गायकवाड यांनी शिवसेना कल्याण शहर प्रमुख महेश गायकवाड यांच्यावर गोळीबार केला होता. उल्हासनगर येथील हिललाईन पोलीस ठाण्यातच ही गोळीबाराची घटना घडली शुक्रवारी रात्री आहे. यामुळे राजकीय वर्तुळात खळबळ उडाली आहे. याप्रकरणी हिललाईन पोलीस ठाण्यात आमदार गायकवाड यांच्यासह 6 जनांविरोधात गुन्हा दाखल करण्यात आला आहे. पोलिसांनी आमदार गणपत गायकवाड,

संदीप सरवणकर, हर्षल केणे तसेच विकी गणात्रा याला अटक केली आहे. गायकवाड यांचा मुलगा वैभव याच्या विरोधात देखील गुन्हा दाखल असून वैभव व नागेश बडेकर याचा पोलीस शोध घेत आहेत. काही दिवसांपूर्वी विकी याने ठाणे गुन्हे शाखेकडे आत्मसमर्पण केले होते. पोलिसांनी त्याला अटक केली. आणि आता रणजीत यादवला अटक करण्यात आली आहे. रणजीत यादव हा आमदार गणपत गायकवाड यांचा खाजगी चालक आहॆ. क्राईम ब्रँच पोलिसांनी रणजीत यादवला शनिवारी ताब्यात घेत रविवारी उल्हासनगर कोर्टात हजर केले आहे.

शिवसेना शहरप्रमुख महेश गायकवाड आणि त्यांचे मित्र राहुल पाटील यांच्यासह 70 जणांच्या विरोधात गुन्हा दाखल....

भाजप आमदार गायकवाड यांच्याकडून करण्यात आलेल्या गोळीबार प्रकरणी एक महत्त्वाची अपडेट समोर आली आहे. संबंधित घटना ही जागेच्या वादातून झाल्याचे समोर आले आहे. या प्रकरणी पोलिसांकडून तपास सुरु आहे. पोलिसांनी याप्रकरणी शिवसेना शहरप्रमुख महेश गायकवाड आणि त्यांचे मित्र राहुल पाटील यांच्यासह 70 जणांच्या विरोधात गुन्हा दाखल केला आहे. या सर्व 70 जणांवर जमीन बळकावल्याचा गुन्हा दाखल करण्यात आला आहे.

या प्रकरणी उल्हासनगर न्यायालयात चार जणांना जामीन मंजूर करण्यात आला आहे. कुठली ही परवानगी न घेता जागेवर कब्जा करण्यासाठी सशस्त्रपणे मोठ्या संख्येने शिरून, जागेवरील कामगारांना शिवीगाळ करत, जागेतील सामानाचे नुकसान केल्याचा गुन्हा त्यांच्यावर दाखल करण्यात आलाय. तर पोलिसांनी इतर 66 जणांची चौकशी सुरू केली आहे. आत्तापर्यंत पाच जणांची चौकशी याप्रकरणी करण्यात आली आहे. महेश गायकवाड, राहुल पाटील यांच्यावर उपचार झाल्यानंतर त्यांची देखील पोलीस चौकशी करणार आहेत, अशी देखील माहिती समोर आली आहे.