नागपूर : अभिनेता शाहरुख खानचा मुलगा आर्यन खानवर (Aryan Khan case) एनसीबीने कारवाई केल्यानंतर मंत्री नवाब मलिक (minister nawab malik) अधिकच आक्रमक झालेले पाहायला मिळतात. त्यांच्या जावयावर देखील एनसीबीने आरोप केले आहेत. त्यामुळे नवाब मलिक वारंवार एनसीबीच्या अधिकाऱ्यांवर वेगवेगळे आरोप करताना दिसतात. त्याबाबतच गृहमंत्री दिलीप वळसे (home minister dilip walse patil ) पाटील यांनी प्रतिक्रिया दिली असून 'आर्यन खान आणि नवाब मलिक हे दोन वेगळे विषय' असे ते म्हणाले. गृहमंत्री सध्या विदर्भ दौऱ्यावर असून त्यांनी नागपुरातील दीक्षाभूमीला भेट दिली. यावेळी ते पत्रकारांशी बोलत होते.

केंद्राच्या तपास यंत्रणांचा उपयोग विरोधकांना नेस्तनाबूत करण्यासाठी होतोय. यापूर्वी असं कधीही घडलं नव्हतं. नवाब मलिक आणि आर्यन खान हे दोन विषय वेगळे आहेत. नवाब मलिक यांचे एनसीबी आणि त्याच्या अधिकाऱ्यांवर काही आक्षेप आहेत. त्यामुळे ते वारंवार बोलत असतात, असेही गृहमंत्री म्हणाले.

दीक्षाभूमीला भेट देण्याची इच्छा पूर्ण -

नागपूरला ऐतिहासिक असा वारसा लाभला आहे. गृहमंत्री झाल्यानंतर मी नागपूरला आलो आहे. यावेळी दीक्षाभूमीला जाऊन डॉ. बाबासाहेबांच्या स्मृतींना अभिवादन करण्याची इच्छा होती. आज ती इच्छा पूर्ण झाली, असेही गृहमंत्री म्हणाले.

परमबीरसिंह यांनी अँटेलिया प्रकरणातील माहिती लपविली होती?

परमबीरसिंह यांनी अँटेलिया स्फोटके प्रकरणातील माहिती लपविली होती का? असा प्रश्न विचारला असता गृहमंत्री म्हणाले, ''आयोगाच्या समोर काय माहिती आली आणि कोणी माहिती लपविली? हा चौकशीचा भाग आहे. आयोगाचा अहवाल आल्याशिवाय त्याबाबत काय कारवाई करायची? हे कसं ठरवणार.''