वाशीम, मुंबई : वेगवेगळ्या कारणांमुळे वादात आलेल्या आयएएस अधिकारी पूजा खेडकर यांचा वाशीम जिल्ह्यातील प्रशिक्षण कालावधी तत्काळ थांबविण्यात आला आहे. राज्याच्या सामान्य प्रशासन विभागाचे अतिरिक्त मुख्य सचिव नितीन गद्रे यांनी हा आदेश मंगळवारी (ता.१६) रोजी सायंकाळी पूजा खेडकर यांना बजावला आहे. खेडकर यांचा जिल्हा प्रशिक्षण कार्यक्रम स्थगित करण्याचे आदेश महाराष्ट्र शासनाने दिले आहेत. लाल बहादूर शास्त्री प्रशासकीय अकादमीने दिलेल्या निर्देशानुसार महाराष्ट्र शासनाने ही कारवाई केली आहे. महाराष्ट्रातील प्रशिक्षण कालावधी थांबविण्यासोबतच त्यांना मसुरीतील प्रशिक्षण संस्थेत परत बोलावण्यात आले आहे. खेडकर यांना २३ जुलै पूर्वी मसुरी येथील अकादमीमध्ये हजर राहावे लागणार आहे. नव्या आदेशामुळे पूजा खेडकर यांच्या अडचणीत त्यामुळे वाढ झाली आहे.

पूजा खेडकर यांचे प्रशिक्षण तीन जून २०२४ पासून पुणे जिल्हाधिकारी कार्यालयात प्रशिक्षण सुरू झाले होते. पूजा खेडकर यांनी त्यांच्या खासगी गाडीवर अंबर दिवा लावत महाराष्ट्र शासन असे लिहिले होते. याबाबत वाद झाल्याने पुणे जिल्हाधिकारी कार्यालयातून त्यांची तत्काळ वाशीम येथे बदली झाली होती. वाशीममध्ये दोन वर्षांचा प्रशिक्षण कालावधी होता; मात्र आता यावर स्थगिती देण्यात आली आहे.

खासगी गाडीवर लाल दिवा लावणे आणि स्वतंत्र केबिनसाठी आग्रह धरणे यामुळे प्रशिक्षणावर असलेल्या पूजा खेडकर चर्चेत आल्या होत्या. त्यानंतर खेडकर यांच्या शारीरिक अपंगत्व आणि ओबीसी प्रमाणपत्र बोगस असल्याचा आरोप झाला असून त्याबाबत चौकशी होणार आहे. याच मुद्द्यांवर पंतप्रधान कार्यालय आणि मसुरी येथील लाल बहादूर शास्त्री प्रशासकीय अकादमीने पूजा खेडकर यांची चौकशी सुरू केली आहे. 

पूजा खेडकर यांनी यूपीएससी परीक्षा उत्तीर्ण होण्यासाठी बनावट दिव्यांग प्रमाणपत्र काढल्याचा आरोप आहे. तसेच त्यांची आणि त्यांच्या वडिलांची कोट्यवधींची संपत्ती असतानाही त्यांनी नॉन क्रिमी लेअरचे प्रमाणपत्र काढल्याचे समोर आले आहे. खेडकर यांनी अहमदनगर जिल्हा रुग्णालयातून सुरूवातीला दोन दिव्यांग प्रमाणपत्र काढली होती. नंतर त्या दोन्ही अपंग प्रमाणपत्रांचे एकत्रिकरण करून एकच प्रमाणपत्र देण्यात आले असून त्यामध्ये पूजा खेडकर या ५१ टक्के अपंग असल्याचे नमूद करण्यात आले असल्याचीही माहिती मिळत आहे.