छत्रपती संभाजीनगर - काही दिवसांपूर्वीच औरंगाबाद शहराच्या नामांतराची घोषणा केली होती. मात्र हा मुद्दा कायद्याच्या कचाट्यात अडकला होता. शिवाय ग्रामीणला छत्रपती संभाजीनगर हे नाव देण्यात आलं नव्हतं. आज याबाबत घोषणा करण्यात आली. आज पुन्हा एकदा नामांतरासंदर्भात नोटीफिकेशन काढण्यात आलं. यावरून एमआयएमचे खासदार इम्तियाज जलील यांनी सरकारवर जोरदार टीका केली आहे.

मराठवाड्याच्या पॅकेजसंदर्भात जलील म्हणाले की, आम्हाला काहीही अपेक्षा नाही. केवळ निवडणुकासमोर ठेवून गाजर दाखवण्याचं काम सुरू आहे. २०१६ मध्ये घोषणा केल्या होत्या. हेच लोक तेव्हा सत्तेत होते. त्यावेळी घोषणा केलेले कामं अजुनही सुरू झाली नाही. त्यांचा एकच उद्देश आहे की, शहरामध्ये निवडणुकीला कसा फायदा होईल, असा आरोपही जलील यांनी केला.

नामांतरावर जलील म्हणाले की, सरकार निवडणूक पुढं ठेवून काम करत आहेत. मराठवाड्यात आल्यावर त्यांनी शेतकऱ्यांसाठी घोषणा करणं अपेक्षीत होतं. नामांतराचा मुद्दा कोर्टात आहे. मग घोषणा कशी केली असा सवाल जलील यांनी केला. तसेच तुमचा उद्देश काय आहे, इथं येण्याचा ते सांगा. तुम्ही नाव बदललं, तर मग आश्वासन द्या की, एकही शेतकऱ्याची आत्महत्या होऊ देणार नाही, युवकांना रोजगार देऊ. केवळ लोकांना वेड्यात काढण्यासाठी हे आले आहेत, असंही जलील यांनी म्हटलं.