राष्ट्रवादी काँग्रेसमध्ये फूट पडल्यानंतर आणि पक्षात दोन गट निर्माण झाल्यानंतर शरद पवार यांनी महाराष्ट्रभरात सभा, बैठका घेण्यास सुरूवात केली आहे. पुन्हा पक्ष बांधणीसाठी येवला, बीड नंतर आज जळगावात राष्ट्रवादी काँग्रेसचे अध्यक्ष शरद पवार यांची सभा पार पडणार आहे. जळगाव शहरातील सागर पार्क मैदानावर आज दुपारी ही तीन वाजता ही जाहीर सभा पार पडणार आहे. राष्ट्रवादी काँग्रेसमध्ये फूट पडल्यानंतर जळगाव जिल्ह्यातील शरद पवार यांची ही पहिली सभा आहे.

दरम्यान शरद पवार जळगावमध्ये दाखल झाले आहेत. त्यानंतर त्यांनी पत्रकार परिषद घेतली. यावेळी त्यांनी शेतकऱ्यांचे प्रश्न, मराठा आंदोलन, जालन्यात झालेला लाठीचार्ज त्याचबरोबर 18 ते 22 सप्टेंबर दरम्यान होणाऱ्या संसदेचं विशेष अधिवेशनामध्ये इंडिया शब्द हटवण्यावर भाष्य केलं आहे.

राष्ट्रपती भवनात ९ सप्टेंबर रोजी होणाऱ्या G20च्या निमंत्रण पत्रिकेवर 'President Of India' च्या ऐवजी 'President Of Bharat' लिहण्यात आलं आहे. यावर पत्रकार परिषदेत शरद पवारांना प्रश्न करण्यात आला होता. त्यावर उत्तर देताना शरद पवार म्हणाले की, इंडिया काय किंवा भारत काय मला त्यावर वाद घालायचा नाही, असं पवार म्हणाले आहेत.

त्याचबरोबर 18 ते 22 सप्टेंबरदरम्यान होणाऱ्या संसदेचं विशेष अधिवेशनामध्ये इंडिया शब्द हटवण्यासाठी विधेयक येणार असल्याच्या चर्चा सूरू आहेत. अधिवेशनात इंडिया शब्द हटवण्यासाठी विधेयक येण्याची शक्यता वर्तवण्यात येत आहे. तर घटनेमधून शब्द कायमचा हटवण्यासाठी केंद्र सरकारी तयारी असल्याचीही माहिती आहे.

यावर प्रतिक्रिया देताना शरद पवार म्हणाले की, 'मला तशी काही माहिती नाही. उद्या मल्लिकार्जून खर्गे यांनी बैठक बोलावली आहे. इंडिया बैठकीत सहभागी झालेले पक्ष आहेत त्यांच्या प्रमुखांची उद्या बैठक आहे. या बैठकीत या गोष्टींचा विचार होईल. पण, हे नाव हटवण्याचा आधिकार कोणालाही नाही. कोणीही नाव हटवू शकत नाही, देशाशी निगडीत असलेले नावांबाबत अस्वस्थता सत्ताधारी पक्षांना का असते हे मला समजतं नाही, असं शरद पवार यावेळी म्हणाले आहेत.